Бэта версія

Cerca

Vatican News
Ілюстрацыйнае фота Ілюстрацыйнае фота  (AFP or licensors)

Святы Айцец: “культура адчужэння” – хвароба сучаснага свету

Папа скіраваў пасланне да ўдзельнікаў VIII Сусветнага сацыяльнага форума аб міграцыі, які 2-4 лістапада 2018 г. праходзіць у Мехіка на тэму: “Мігрыраваць, супраціўляцца, будаваць, змяняць”.

Каб здзейсніць радыкальнае ператварэнне нашых грамадстваў, трэба адмовіцца ад усіх форм насілля, якія сёння шукаюць апраўдання ў “культуры адчужэння” – “эпідэмічнай хваробе сучаснага свету”, заўважыў Францішак. Ён падкрэсліў, што Сусветны сацыяльны форум аб міграцыі з’яўляецца магчымасцю, каб даць голас тым, хто яго не мае: мігрантам, бежанцам, абяздоленым, якіх ігнаруюць, эксплуатуюць, падвяргаюць насіллю і знявазе пры саўдзельным маўчанні многіх.

Паводле Папы, недастаткова проста асуджаць гэту з’яву. Неабходна вылучыць кіруючыя прынцыпы, каб знайсці рашэнне праблем, акрэсліваючы ролі і адказнасць усіх удзельнікаў працэсу. У сферы міграцыі, неабходна выкарыстаць здольнасці і памкненні мігрантаў, бежанцаў і абяздоленых, каб будаваць “інклюзіўныя, справядлівыя і салідарныя грамадствы, здольныя вярнуць годнасць тым, хто жыве з вялікай няўпэўненасцю і не можа марыць пра лепшы свет”, напісаў ён.

Францішак заклікаў міжнародную супольнасць прыкласці ўсе намаганні для заключэння двух фундаментальных, у кантэксце міграцыйнага крызісу, міжнародных дакументаў: па бяспечнай, упарадкаванай і законнай міграцыі і па правах бежанцаў.

Папа нагадаў, што Секцыя па справах мігрантаў і бежанцаў ватыканскай Дыкастэрыі па служэнні інтэгральнаму развіццю чалавека падрыхтавала праграму з дваццаці пунктаў, якія могуць дамагачы адказаць на выклікі, якія сучасны міграцыйны крызіс паставіў перад палітычнай супольнасцю, грамадствам і Касцёлам. Іх можна абагульніць у чатырох словах: прымаць, абараняць, падтрымліваць і інтэграваць, заўважыў Пантыфік.

Для вырашэння міграцыйнай праблемы неабходна супрацоўніцтва, а таксама транспарэнтны, шчыры і канструктыўны дыялог паміж усімі бакамі, напісаў Папа і запэўніў у гатоўнасці Касцёла прымаць удзел у гэтым працэсе.

Навіна ў фармаце аўдыё
03 лістапада 2018, 11:33