Бэта версія

Cerca

Vatican News
Ілюстрацыйнае фота Ілюстрацыйнае фота  (AFP or licensors)

Святы Пасад заклікае свет да салідарнай міграцыйнай палітыкі

Святы Пасад заклікае міжнародную супольнасць памятаць, што за ашаламляльнымі лічбамі статыстыкі па міграцыі стаяць канкрэтныя людзі, з годнасцю і правам на бяспечныя і спрыяльныя ўмовы жыцця.

На чарговым пасяджэнні 73-й сесіі Генеральнай Асамблеі Арганізацыі Аб’яднаных Нацый, прысвечаным аналізу міграцыйнага крызісу ва ўмовах глабалізацыі, арцыбіскуп Бернардзіта Ауса агучыў пазіцыю Апостальскай Сталіцы, якая выступае за ўзмацненне міжнароднай салідарнасці ў пытаннях бежанцаў і мігрантаў.

Пастаянны назіральнік Апостальскай Сталіцы пры ААН у чарговы раз спыніўся на шматстайнасці фактараў, якія становяцца рухаючай сілай міграцыі, – тых, што прымушаюць пакідаць родную краіну (насілле, небяспека, парушэнне чалавечых правоў, кліматычныя змены), і тых, што прывабліваюць надзеяй на лепшае жыццё (большыя магчымасці, змены ў структуры працоўнага рынку). Іерарх адзначыў, што любое паспяховае намаганне ў вырашэнні міграцыйнага крызісу павінна пачынацца з ліквідацыі фактараў, якія падштурхоўваюць людзей да ўцёкаў з радзімы, бо яны – нібы агонь: “калі мы пагасім агонь, нам не трэба будзе ўзводзіць новыя дамы”.

Прадстаўнік Апостальскай Сталіцы нагадаў, што для прымаючых краін міграцыя – гэта не толькі дадатковыя выдаткі, але і крыніца карысных для дэмаграфіі і эканомікі рэсурсаў. Арцыбіскуп Ауса прывёў словы папы Францішка, які, у сваю чаргу, падкрэслівае, што бежанцы і мігранты “прыбываюць не з пустымі рукамі. Яны нясуць з сабой мужнасць, здольнасці, энергію і спадзяванні, а таксама скарбы ўласных культур”.

Глабальнае пагадненне ААН па бяспечнай, рэгулярнай і ўпарадкаванай міграцыі і Глабальнае пагадненне ААН па бежанцах “сцвярджаюць нашу агульную адказнасць у імкненні да ўсеагульнага дабра і клопаце пра найбольш патрабуючых салідарнасці”, працягнуў арцыбіскуп Ауса. Узмацненне міжнароднай салідарнасці перад абліччам міграцыйнага крызісу павінна выяўляцца, у першую чаргу, у павелічэнні аб’ёмаў інвестыцый у сферы адукацыі, аховы здароўя і прафесійнай падрыхтоўкі маладых людзей.

Пастаянны назіральнік Апостальскай Сталіцы пры ААН выказаў спадзяванне, што намаганне, прыкладзенае на распрацоўку Глабальных пагадненняў, атрымае працяг у забеспячэнні павагі правоў і годнасці мігрантаў і бежанцаў і адначасова ў прызнанні суверэннага права краін распрацоўваць уласную нацыянальную міграцыйную палітыку ў святле сваіх абавязацельстваў у рамках міжнароднага права.

Навіна ў фармаце аўдыё
20 кастрычніка 2018, 12:01