Леў XIV пацвердзіў паўнамоцтвы кіраўніцтва Рымскай курыі
Аляксандр Амяльчэня - Vatican News
Зала Друку апублікавала афіцыйны камунікат, у якім паведамляецца пра першае адміністрацыйнае рашэнне новага Пантыфіка. Леў XIV выказаў жаданне, каб кіраўнічы склад і чальцы ўстаноў Рымскай курыі, а таксама сакратары і старшыні Папскай камісіі па справах Дзяржавы Ватыкан "часова працягвалі выкананне сваіх абавязкаў donec aliter provideatur (пакуль не будзе вырашана іначай)".
Час на разважанне і малітву
"Святы Айцец жадае даць сабе пэўны час на разважанне, малітву і дыялог перад ажыццяўленнем любых прызначэнняў ці канчатковага пацвярджэння", - гаворыцца ў камунікаце Святога Пасада.
Згодна з апостальскай канстытуцыяй "Universi Dominici Gregis", са смерцю Папы аўтаматычна спыняюцца паўнамоцтвы кіраўнікоў ватыканскіх дыкастэрый, дзяржаўнага сакратара і чальцоў большасці рад і камісій. Традыцыйна новаабраны Пантыфіка часова аднаўляе іх на пасадах перад увядзеннем змен ці паўторнымі прызначэннямі.
Афіцыйны пратакол прыняцця імя
Таксама 9 мая 2025 года быў афіцыйна апублікаваны тэкст пратакола прыняцця пасады Біскупа Рыма і выбранага імя новым Папам. Дакумент быў складзены арцыбіскупам Дыега Равэлі, майстрам папскіх літургічных цырымоній, які выконваў функцыі натарыуса падчас канклава.
У пратаколе адзначаецца, што кардынал Роберт Прэвост прыняў кананічнае абранне на "Найвышэйшага Пастыра" і выбраў "імя Леў XIV". Абранне адбылося 8 мая 2025 года.
