Пошук

Білборд з анонсам папскага візіту ў Кіншасе Білборд з анонсам папскага візіту ў Кіншасе  (AFP or licensors)

Пантыфік папрасіў суправаджаць свой афрыканскі візіт малітвай

29 студзеня 2023 года, пасля малітвы Анёл Панскі Папа падзякаваў уладам і епіскапатам Дэмакратычнай Рэспублікі Конга і Паўднёвага Судана за запрашэнне і падрыхтоўку яго хуткіх візітаў у краіны.

Аляксандр Амяльчэня - Vatican News

У кароткім пасланні Францішак прызнаўся, што ўжо даўно хацеў наведаць гэтыя дзве краіны, і назваў сваё афрыканскае падарожжа пілігрымкай міру і згоды.

“Гэтыя землі, размешчаныя ў цэнтры вялікага афрыканскага кантынента, выпрабоўваюцца працяглымі канфліктамі: Дэмакратычная Рэспубліка Конга пакутуе, асабліва на ўсходзе краіны, ад узброеных сутычак і эксплуатацыі; у той час як Паўднёвы Судан, які раздзіраецца гадамі вайны, не можа дачакацца заканчэння пастаяннага насілля, якое прымушае шматлікіх людзей жыць у статусе перамешчаных і ва ўмовах вялікіх цяжкасцей”, - звярнуў увагу Пантыфік.

Ён нагадаў, што прыедзе ў Паўднёвы Судан разам з Архіепіскапам Кентэрберыйскім і мадэратарам Генеральнай асамблеі Царквы Шатландыі. “Такім чынам мы правядзём час разам, як браты, у экуменічнай пілігрымцы міру”, - сказаў Францішак.

Ён папрасіў вернікаў суправаджаць апостальскае падарожжа, якое распачнецца 31 студзеня 2023 года, сваёй малітвай.
 

29 студзеня 2023, 12:19