Пантыфік: быць місіянерам – значыць дзяліцца Божымі дарамі
Аляксандр Панчанка - Vatican News
Пантыфік нагадаў вернікам, што быць місіянерам – “значыць выходзіць па-за сябе, каб праявіць свае найлепшыя якасці і падарыць іншым лепшае з таго, што атрымалі ў дар ад Бога”. Ён прывітаў удзельнікаў ініцыятывы, выказваючы ім падзяку за працу і заклікаючы працягваць місіянерскую дзейнасць.
Евангелізацыйная місія салідарнасці сярод карэнных народаў на поўначы Аргентыны рэгулярна рэалізуецца з 2019 года. Яе арганізатарам з'яўляецца ксёндз Марыяна Кардэйра з дыяцэзіі Рыа-Куарта. Папа запэўніў святара ў сваім благаслаўленні і малітве.
У рамках ініцыятывы на працягу бліжэйшага тыдня яе ўдзельнікі наведаюць насельніцтва самых бедных рэгіёнаў Аргентыны, спакутаванае ад недаядання, недахопу пітной вады і медыцынскай дапамогі. Місіянеры пераадоляць каля пяці тысяч кіламетраў, хрысцячы, цэлебруючы святую Імшу, несучы Божае слова, дзелячыся жыццём і верай, прысвячаючы час сем’ям і дзецям. Акцыя праходзіць пад дэвізам: “Мары будуюцца разам”.
“Мы маглі дакрануцца да цела Езуса ў гэтых людзях. Пасярод крайняй беднасці, якая раніць нас і робіць бяссільнымі, Езус глядзеў і ўсміхаўся нам у абліччы кожнага брата”, - падзяліўся досведам ксёндз Кардэйра.
