Пантыфік узначаліць кансісторый па кананізацыйных справах
4 сакавіка 2022 года Францішак узначаліць Звычайны публічны кансісторый, падчас якога будуць разгледжаны кананізацыйныя справы. Ён пройдзе ў Зале кансісторыяў ватыканскага Апостальскага палацу.
Аляксандр Амяльчэня - Vatican News
Кардыналы разгледзяць тры кананізацыйныя справы. Гаворка пойдзе пра благаслаўлёных: галандскага кармеліта Ціта Брандсму (1881-1942), свецкае імя якога Ано Шурд, забітага з нянавісці да веры ў нацысцкім канцэнтрацыйным лагеры Дахаў; італьянскую законніцу Марыю ад Езуса (1852-1923), свецкае імя якой Караліна Сантаканале, заснавальніцу Кангрэгацыі Сясцёр Капуцынак Беззаганнай з Лурда; а таксама французскую законніцу Марыю Рыўе (1768-1838), заснавальніцу Кангрэгацыі Сясцёр Ахвяравання Марыі.
Раней Святы Айцец даручыў Кангрэгацыі па справах кананізацыі абнародаваць дэкрэты аб мучаніцтве і сапраўднасці цудаў, здзейсненых праз заступніцтва згаданых вышэй благаслаўлёных.
22 лютага 2022, 12:40
