Францішак змяніў асабістага сакратара

Паведаміўшы аб рашэнні Святога Айца, кіраўнік Залы Друку Матэа Бруні дадаў, што “ў кантэксце звычайнай ратацыі служачых, арганізаванай Францішкам для супрацоўнікаў Рымскай курыі, мансеньёр Ёаніс Лахзі Гайд, асабісты сакратар Папы з красавіка 2014 г., завяршае сваё служэнне”.

Егіпецкі святар працягне займаць цяперашнюю пасаду ў якасці члена Камітэта па дасягненні мэтаў “Дэкларацыі аб чалавечым братэрстве”. Гэтая міжрэлігійнага арганізацыя займаецца пасоўваннем Дакумента, падпісанага ў лютым 2019 г. у Абу-Дабі папам Францішкам і Вярхоўным імамам Аль-Азхар Ахмедам Эль Таебам, у інтарэсах міру і суіснавання ва ўсім свеце.

Новы папскі сакратар, кс. Фабіа Салерна нарадзіўся ў калабрыйскім горадзе Катандзара 25 красавіка 1979 г. Стаў святаром 19 сакавіка 2011 г. і пачаў служэнне ў архідыяцэзіі Катандзара-Сквілачэ. Атрымаў навуковую ступень доктара абодвух правоў (Utroque Iure) у Папскім латэранскім універсітэце ў Рыме. Пасля заканчэння Папскай касцёльнай акадэміі кс. Салерна служыў сакратаром у Апостальскай нунцыятуры ў Інданэзіі, у пастаянным прадстаўніцтве Святога Пасаду пры Савеце Еўропы ў Страсбургу, а затым працягнуў служэнне ў Секцыі па сувязях з дзяржавамі ў ватыканскім Дзяржсакратарыяце.

Мансеньёр Фабіа Салерна будзе супрацоўнічаць з уругвайскім святаром Гансала Аэміліюсам, які змяніў у студзені 2020 г. на пасадзе асабістага сакратара Папы 55-гадовага аргентынца, мансеньёра Фабіяна Пэдак’ё.