Папа падтрымаў рэзалюцыю ААН аб спыненні агню на фоне пандэміі

Францішак скіраваў свой заклік падчас сустрэчы з вернікамі на малітве “Анёл Панскі”, якая 5 ліпеня 2020 г. прайшла ў Ватыкане. Ён нагадаў, што на гэтым тыдні Рада Бяспекі Арганізацыі Аб’яднаных Нацый прыняла рэзалюцыю, якая прадугледжвае некаторыя меры для барацьбы з разбуральнымі наступствамі віруса COVID-19, асабліва на тэрыторыях, дзе адбываюцца канфлікты.

“Вартай пахвалы з’яўляецца просьба аб глабальным і неадкладным спыненні агню, якое дало б магчымасць для міру і бяспекі, неад’емных для аказання гуманітарнай дапамогі, тэрмінова неабходнай. Заклікаю да эфектыўнага і своечасовага ажыццяўлення гэтага рашэння дзеля дабра людзей, што пакутуюць. Няхай гэта рэзалюцыя Рады Бяспекі стане першым мужным крокам для мірнай будучыні”, - пажадаў Святы Айцец.