Францішак адзначае шостую гадавіну пантыфіката
За шэсць гадоў пантыфікату Папа прамовіў больш за тысячу гаміліі, з якіх каля 670 – у капліцы ватыканскага Дома св. Марты; выступіў з больш чым 1200 публічнымі зваротамі, 264 катэхезамі ў рамках агульных аўдыенцый па серадах, 342 каментарамі да нядзельнага Евангелля перад малітвай “Анёл Панскі”.
Францішак выдаў дзве энцыклікі: “Lumen fidei”, напісаную ў “чатыры рукі” з Бэнэдыктам XVI і “Laudato si’”, прысвечаную экалогіі; тры Апостальскія адгартацыі: “Evangelii gaudium”, якая стала праграмным дакументам яго пантыфікату; “Amoris laetitia”, прысвечаную сям’і, “Gaudete et exsultate”, аб святасці ў сучасным свеце.
Святы Айцец абнародаваў таксама 36 Апостальскіх канстытуцый, 27 Апостальскіх лістоў у форме “motu proprio”, булу, якой абвясціў Святы Юбілейны Год, прысвечаны Божай Міласэрнасці.
Папа старшынстваваў на трох Сінодах Біскупаў, два з якіх былі прысвечаны сям’і і адзін – моладзі. Ён здзейсніў 27 Апостальскіх падарожжаў, у рамках якіх наведаў 41 краіну свету, а таксама 24 падарожжы па тэрыторыі Італіі.
За час пантыфікату Францішка ў Касцёле з’явіліся 49 святых, сярод якіх такія знакавыя для мінулага стагоддзя постаці як Ян ХХІІІ, Павел VI, Ян Павел ІІ, Маці Тэрэза з Калькуты, арцыбіскуп Оскар Рамэра, сведкі марыйных аб’яўленняў у Фаціце Франсішку і Жасінта Марту, бацькі св. Тэрэзы ад Дзіцятка Езуса – Луі Мартэн і Зэлі Герэн, а таксама больш за 1100 благаслаўлёных.
Пантыфік актыўна прысутнічае ў сацыяльных сетках. Афіцыйны “папскі” канал у “Твітэр”, які мае дзевяць моўных версій, чытае каля 50 млн. чалавек, а на яго старонку ў “Інстаграм” падпісаны каля 6 млн. чалавек розных веравызнанняў, нацыянальнасцей і культур.
Пантыфік выкарыстовае для распаўсюджвання евангельскага паслання розныя сродкі, але ў першую чаргу ўласны прыклад пакоры, любові і ўвагі да людзей, асабліва да найбольш патрабуючых і безабаронных, у якіх бачыць прысутнасць самаго Хрыста.