Пошук

Vatican News
Ілюстрацыйнае фота Ілюстрацыйнае фота  (Vatican Media)

Папа скіраваў пасланне на Сусветны дзень сацыяльнай камунікацыі

“З таго часу як інтэрнэт стаў даступным, Касцёл заўсёды імкнецца спрыяць, каб яго выкарыстанне служыла сустрэчы і салідарнасці”, - напісаў Папа ў пасланні на Сусветны дзень сацыяльнай камунікацыі.

Дакумент на тэму: “Мы – часткі адзін аднаго” (Эф 4, 25). Ад сеткавай суполкі да чалавечай супольнасці” быў абнародаваны 24 студзеня 2019 г. У ім Францішак заклікаў да глыбокай рэфлексіі над важнасцю сапраўдных адносін для кожнага чалавека.

Святы Айцец падкрэсліў, што інтэрнэт можа быць “крыніцай ведаў і стасункаў, якія яшчэ нядаўна немагчыма было ўявіць”. У той жа час, ён можа быць месцам, у якім распаўсюджваецца дэзінфармацыя, “свядомае і мэтанакіраванае скажэнне фактаў” і дыскрэдытацыя.

Паводле Папы, “трэба прызнаць, што сацыяльныя сеткі, з аднаго боку, служаць, каб усё больш і больш злучаць нас, дапамагаць нам знаходзіць адно аднаго і аказваць узаемную падтрымку, а з іншага, выкарыстоўваюцца для маніпуляцый асабістымі дадзенымі з мэтай атрымання палітычнай ці эканамічнай выгады, без належнай павагі да асобы і яе правоў”.

Францішак звярнуў асаблівую ўвагу на рызыкі, з якімі сутыкаецца ў інтэрнэце моладзь.

“[Статыстыка паказвае, што адзін з чатырох людзей маладога ўзросту меў справу з выпадкамі кібербулізму]”

, - заўважыў ён.

Папа перакананы, што “сеткавая суполка не з’яўляецца аўтаматычна сінонімам супольнасці”. У лепшым выпадку, інтэрнэт-суполкі могуць даваць сведчанне згуртаванасці і салідарнасці, але часта застаюцца толькі агрэгатам індывідуумаў, якіх аб’ядноўваюць выключна супольныя інтарэсы або тэмы, але якія маюць слабыя повязі паміж сабой.

Францішак зазначыў, што “сеціва з’яўляецца магчымасцю для спрыяння сустрэчы з іншымі, але можа таксама ўмацоўваць нашу самаізаляцыю, на падабенства павуцінню, якое ловіць у пастку”. Паводле яго, моладзь бывае схільнай да ілюзіі, што сацыяльныя сеткі могуць цалкам задаволіць патрэбу ў адносінах. Існуе “небяспечны феномен маладых сацыяльных пустэльнікаў, якія рызыкуюць цалкам аддаліцца ад грамадства”, папярэдзіў Папа.

Лейтматывам дакумента з’яўляецца ўрывак з Паслання да Эфесцаў “Дзеля таго адкіньце падман, гаварыце праўду кожны свайму бліжняму, бо мы – часткі адзін аднаго” (4,25). Спасылаючыся на гэтыя словы, Францішак падкрэсліў, што праўда раскрываецца ў адзінстве, а падман – гэта “эгаістычнае адмаўленне прызнаць уласную прыналежнасць да цела; адмаўленне ад таго, каб прыносіць сябе ў дар, губляючы такім чынам адзіны шлях да таго, каб знайсці сябе”.

Сваё пасланне Пантыфік завяршае заклікам да адказнага і карэктнага выкарыстання інтэрнэту. Яно павінна быць камплементарным сапраўднай сустрэчы паміж людзьмі.

“[Такога сеціва мы прагнем. Сеціва, створанага не для таго, каб лавіць у пастку, але, каб вызваляць, каб захоўваць адзінства паміж свабоднымі людзьмі]”

, - напісаў Папа.

Ён нагадаў, што Касцёл таксама з’яўляецца сеткай, сатканай з эўхарыстычнай еднасці, дзе “адзінства грунтуецца не на “лайках”, а на праўдзе, на “амэн”, праз якое кожны далучаецца да Цела Хрыста, прымаючы іншых”.

Сусветны дзень сацыяльнай камунікацыі ўстанавіў Павел VI. Упершыню ён прайшоў 7 мая 1967 г. З таго часу штогод у Каталіцкім Касцёле адзначаецца прафесійнае свята супрацоўнікаў СМІ з адмысловым дэвізам і папскім пасланнем. Сёлета ён прыпадае на 2 чэрвеня.

Навіна ў фармаце аўдыё
24 студзеня 2019, 12:06