Cerca

Vatican News
Папа падчас малітвы "Анёл Панскі" Папа падчас малітвы "Анёл Панскі" 

Папа на “Анёл Панскі”: Бог вымярае чысцінёй намераў

У малітве трэба пазбягаць рытуалізму і фармалізму, звярнуў увагу Папа 11 лістапада 2018 г. у сваіх разважаннях перад малітвай “Анёл Панскі”. На плошчы св. Пятра яго слухалі 20 тыс. чалавек.

Прапануем поўны тэкст разважання Святога Айца

“Сённяшняе Евангелле (Мк 12, 38-44) завяршае серыю прамоў Езуса ў Ерузалемскай святыні, і выводзіць на першы план два процілеглых стаўленні: кніжніка і ўдавы. Першы – прадстаўнік важных людзей, багаты, уплывовы; другая прадстаўляе апошніх, бедных, слабых. На самой справе, радыкальнае асуджэнне Езусам кніжнікаў не адносіцца да ўсёй гэтай катэгорыі, але тычыцца тых з іх, якія выстаўляюць напаказ свой сацыяльны статус, хваляцца званнем “рабі”, настаўніка, патрабуюць паважання і займаюць першыя месцы (Мк 12, 38-39). Самае горшае, што гэта іх хвальба носіць перш за ўсё рэлігійны характар, таму што “доўга моляцца напаказ” (Мк 12, 40) і выкарыстоўваюць Бога, каб выклікаць давер да сябе ў якасці абаронцаў Яго закона. І гэта стаўленне высакамер’я і ганарыстасці вядзе іх да пагарды тых, хто мала што значыць або займае эканамічна нявыгаднае становішча, як і ў выпадку з удовамі.

“Езус выкрывае гэты скажоны механізм: асуджае прыгнёт слабых, які ажыццяўляецца інструментальна на аснове рэлігійнай матывацыі, ясна кажучы, што Бог на баку апошняга.”

І жадаючы, каб вучні добра запамяталі гэты ўрок, дае ім яскравы прыклад: паказвае бедную ўдаву, чыё сацыяльнае становішча нязначнае, бо не мае мужа, які мог бы абараніць яе правы, і таму з’яўляецца лёгкай здабычай для нейкага нядобрасумленнага крэдытора. Такія крэдыторы пераследавалі даўжнікоў, патрабуючы пагасіць суму запазычанасці. Жанчына, якая мае намер кінуць у скарбонку дзве манеты, усё, што засталося ў яе, складае сваю ахвяру, спрабуючы застацца незаўважанай, як калі б ёй было сорамна.

І менавіта праз гэты акт пакоры яна зрабіла нешта, што мае вялікае рэлігійнае і духоўнае значэнне. Яе жэст, поўны ахвяры, не пазбегнуў уважлівага позірку Езуса, які – больш за тое – бачыць у ім бляск поўнага ахвяравання сабой, чаму хоча навучыць сваіх апосталаў. Навука, якую сёння дае Езус, дапамагае нам аднавіць тое, што адыгрывае важную ролю ў нашым жыцці і спрыяе канкрэтным і штодзённым адносінам з Богам.

Рэпартаж з плошчы св. Пятра

Браты і сёстры, Божыя меры адрозніваюцца ад нашых. Ён інакш ацэньвае людзей і іх жэсты. Бог вымярае не колькасцю, а якасцю, глядзіць на сэрца і на чысціню намераў. Гэта азначае, што наш “дар” для Бога ў малітве і для іншых у міласэрнасці заўсёды павінен пазбягаць рытуалізму, фармалізму і логікі разліку, выражаць бескарыслівасць. Гэтак жа, як гэта робіць Езус у адносінах да нас, збаўляючы нас бескарысліва, не прымушаючы плаціць за адкупленне.

“Ён збавіў нас бескарысліва. Мы таксама павінны, робячы розныя рэчы, выказваць сваю бескарыслівасць.”

Менавіта таму Езус указвае на гэту бедную і шчодрую ўдаву, як узор хрысціянскага жыцця, што трэба наследаваць. Мы не ведаем, як яе завуць, але ведаем яе сэрца. Мы сустрэнемся з ёй у Небе і пойдзем яе прывітаць. Гэта тое, што мае значэнне перад Богам. Калі ў нас з’яўляецца спакуса паказаць і зафіксаваць нашы жэсты альтруізму, калі мы занадта зацікаўлены поглядам іншых, давайце думаць пра гэтую жанчыну. Гэта дапаможа нам пазбегнуць сітуацый – прабачце за параўнанне – калі мы паводзім сябе як паўліны, што перашкаджае нам ісці да сапраўды важнага і заставацца сціплымі.

Няхай Дзева Марыя, бедная жанчына, якая цалкам прысвяціла сябе Богу, падтрымлівае нас у рашэнні даць Пану і братам не частку сябе, але усіх сябе ў пакорлівай і шчодрай ахвяры”, - сказаў Пантыфік.

Пасля “Анёл Панскі” Францішак прывітаў сабраных на плошчы св. Пятра і папрасіў аб малітве за сябе.

Навіна ў фармаце аўдыё
11 лістапада 2018, 14:43