Бэта версія

Cerca

Vatican News
Ілюстрацыйнае фота Ілюстрацыйнае фота 

Францішак да “SIR”: журналіст – не прафесія, а місія

Святы Айцец павіншаваў італьянскае каталіцкае інфармацыйнае агенцтва “SIR” з 30-годдзем дзейнасці. Віншавальнае пасланне ён скіраваў на імя кіраўніка гэтай структуры Вінчэнца Карада.

“30 гадоў – цудоўны вынік, але гэта не з’яўляецца і не павінна лічыцца канчатковым пунктам”, - напісаў Папа. Ён пажадаў, каб агенцтва працягвала заставацца выключным праектам, які спалучае навіны аб жыцці Касцёла з інфармацыяй грамадскага і культурнага характару, а таксама спрыяе “інфармацыйнай супольнасці, заснаванай на праўдзівасці і ўзаемнасці”.

Перад абліччам распаўсюджанага сёння феномену “фэйкавых навін”, Папа заклікаў журналістаў заўсёды імкнуцца да праўды. “Гэта самае эфектыўнай супрацьяддзе ад фальшы. І памятайце, “каб распазнаваць праўду, трэба адсейваць тое, што спрыяе адзінству і садзейнічае дабру, ад таго, што, наадварот, мае на мэце ізаляванне, падзелы і супрацьстаянне”, - напісаў Пантыфік.

Святы Айцец заклікаў журналістаў станавіцца “голасам тых, хто не мае голасу”.

“Працягвайце асвятляць сваімі інфармацыйнымі фарамі ўсе перыферыі. Бярыце на сябе камунікацыйны цяжар гісторый, якія распавядаеце. Станавіцеся ўсё больш спрагнёнымі праўды. Будзьце абаронцамі навін”

- запрасіў Папа.

Паводле Францішка, журналіст у сучасным свеце, гэта не толькі прафесія, а сапраўдная місія. У патоку навін і віры сенсацый, яго заданне заключаецца ў тым, каб памятаць, што ў цэнтры навіны знаходзіцца не хуткасць, з якой яна перадаецца, і не ўздзеянне на аўдыторыю, але людзі. “Інфармаваць – значыць фарміраваць і працаваць з жыццём людзей”, - адзначыў ён.

“Дарагія сябры, я суправаджаю вас у вашай працы, жадаю быць гатовымі слухаць і весці шчыры дыялог, каб дазволіць заззяць праўдзе. Заклікаю вас усё больш і больш імкнуцца да паўнаты якаснай інфармацыі, здольнай будаваць масты разумення і дыялогу. Крочце, як рабілі дагэтуль, па прыгожых і складаных сцежках разважлівасці, не сыходзячы на кампрамісы ні з кім. Будзьце свабоднымі і далёкімі ад рэдукцыйных мадэляў. Дапамагайце разумець факты ў іх складанасці і глыбокім значэнні”, - напісаў Папа на заканчэнне свайго паслання.

Навіна ў фармаце аўдыё
29 кастрычніка 2018, 11:42