Святы Айцец: вера аб’ядноўвае тэалогію з ласкавасцю
Аўдыенцыя адбылася 13 верасня 2018 г. у Клементыйскай зале ватыканскага Апостальскага палаца, напярэдадні форума, арганізаванага ў Асізі па ініцыятыве італьянскай каталіцкай асацыяцыі “Casa della Tenerezza” (Дом ласкавасці), якая дапамагае сужэнскім парам, што перажываюць цяжкасці ў адносінах.
Папа звярнуў увагу на тое, што тэалогія, як акадэмічная дысцыпліна, і ласкавасць, якая тычыцца міжасабовых адносін, непарыўна злучаны верай. Тэалогія не можа быць абстрактнай, бо ў такім выпадку рызыкуе стаць ідэалогіяй; яна павінна нараджацца ў выніку сустрэчы з уцелаўлёным Словам, падзеі, якая заўсёды нараджае эмоцыі і пачуцці.
Францішак падкрэсліў, што Божая любоў – гэта не агульны абстрактны, але асабісты і канкрэтны прынцып. Яна з дапамогай Святога Духа ўваходзіць у душу чалавека і ператварае яго пачуцці і думкі.
Паводле Святога Айца, ласкавасць дапамагае зразумець міласэрнасць Бога, “закаханага ў чалавеку”, давяраць Яму, адчуць Яго любоў, каб таксама пачаць любіць.
- сказаў Пантыфік.
“Калі ласкавасць не зводзіцца да сентыментальнасці, яна з’яўляецца першым крокам да перамогі над засяроджанасцю на сабе, да выйсця з эгацэнтрызму, які нявечыць чалавечую свабоду. Божая ласкавасць прыводзіць да разумення, што любоў – гэта сэнс жыцця. Тады мы пачынаем усведамляць, што крыніцай нашай свабоды ніколі не з’яўляемся мы самі. І так мы адчуваем сябе пакліканымі несці ў свет любоў Пана, якую атрымалі; пакліканымі несці яе ў Касцёл, сям’ю, грамадства; пакліканымі злучыцца з ёй у служэнні і дары сябе. Усё гэта не ў сілу абавязку, але ў імя любові, любові Таго, хто нас ласкава любіць”, - сказаў Святы Айцец.
Пантыфік заўважыў, што “сёння, як ніколі, патрэбна рэвалюцыя ласкавасці”, якая, на яго думку, выратуе чалавецтва.
Каталіцкая асацыяцыі “Casa della Tenerezza” была заснавана ў 2003 г. У семінарах і сустрэчах, якія арганізуюцца ёй, штогадова прымаюць удзел каля 600 сужэнскіх пар з розных рэгіёнаў Італіі.
