Cerca

Vatican News
Ілюстрацыйнае фота Ілюстрацыйнае фота 

Францішак скіраваў пасланне на Сусветны дзень глухіх

Мы разам пакліканы ісці супраць плыні, баронячы права кожнага чалавека на годнае жыццё, адзначыў Папа з нагоды 60-га Сусветнага дня глухіх, які будзе адзначацца 30 верасня.

Сваё спецыяльнае пасланне Пантыфік скіраваў на імя кіраўніцтва італьянскай Нацыянальнай арганізацыі глухіх (Ente Nazionale Sordi). Ён высока адзначыў яе дзейнасць на карысць людзей, якія пакутуюць ад глухаты, і іх сем’яў.

Францішак звярнуў увагу на пашырэнне “небяспечнай і непрымальнай культуры адчужэння, якая з’яўляецца наступствам антрапалагічнага крызісу, што ставіць у цэнтр не чалавека, а імкненне да эканамічнай выгады, улады і няспыннае спажывальніцтва”.

Папа зазначыў, што ўразлівыя асобы часцей за ўсё становяцца “ахвярамі гэтай культуры”: дзеці “не маюць магчымасці ўдзельнічаць у школьным жыцці”, пажылыя асобы “адчуваюць сябе самотнымі і пакінутымі”, моладзь “губляе сэнс жыцця і бачыць, як у яе крадуць будучыню і лепшыя мары”.

У кантэксце гэтых выклікаў Пантыфік падкрэсліў важнасць існавання асацыяцый, якія падтрымліваюць тых, хто перажывае цяжкасці. Сёння трэба быць “аб’яднанымі і салідарнымі, сустракацца, дзяліцца досведам, поспехамі і паразамі, яднаць рэсурсы”, што спрыяе ўзбагачэнню “гуманітарнай, сацыяльнай і культурнай спадчыны чалавецтва”.

Папа зазначыў, што адзінства прадугледжвае прызнанне здольнасцей і абмежаванняў адно аднаго, і заклікаў, каб інклюзіўнасць стала часткай мыслення і культуры сучаснага чалавека, а заканадаўцы ўсяляк спрыялі гэтаму.

Папа высока ацаніў сацыяльныя і прафесійныя дасягненні італьянскай арганізацыі глухіх, а таксама актыўны ўдзел людзей з інваліднасцю ў місійнай дзейнасці Касцёла, асабліва ў сферы евангелізацыі. “Гэта становіцца прыкладам і стымулам для хрысціянскіх супольнасцей у іх штодзённым жыцці”, - сказаў ён.

Святы Айцец заклікаў працягваць інтэграцыю глухіх у грамадскае жыццё і змагацца з бар’ерамі і дыскрымінацыяй у адносінах да гэтых асоб.

Навіна ў фармаце аўдыё
28 верасня 2018, 14:35