Святы Айцец прыме Прэзідэнта Францыі

Зала Друку Апостальскай Сталіцы паведаміла, што Францішак прыме Эмануэля Макрона на аўдыенцыі, якая пройдзе 26 чэрвеня 2018 г. у ватыканскім Апостальскім палацы.

З нагоды візіту ў Ватыкан французскі лідэр наведае таксама рымскую базыліку св. Яна на Латэране, дзе, падчас урачыстай цырымоніі, якую ўзначаліць Папскі вікарый для Рымскай дыяцэзіі, арцыбіскуп Анджэла Дэ Данаціс, атрымае тытул ганаровага протаканоніка латэранскага капітула.

Эмануэлю Макрону будзе прадэманстраваны ўнутраны дворык базылікі, дзе знаходзіцца статуя французскага караля Генрыха IV, першага латэранскага ганаровага протаканоніка, а таксама Латэранскі апостальскі палац – рэзідэнцыя Рымскіх Пантыфікаў з IV да пачатку XIV стагоддзя.

Традыцыя, якая лучыць базыліку св. Яна на Латэране з французскімі правіцелямі, сягае да эпохі сярэдневечча, а менавіта да пачатку XIV ст., калі кароль Карл V ахвяраваў значную суму грошай на аздабленне гэтай святыні.

Напрыканцы XVI ст. Генрых IV Наварскі, пасля таго як перайшоў з кальвінізму ў каталіцтва, падарыў капітулу вялікія зямельныя ўладанні. У якасці падзякі, у дворыку базылікі св. Яна на Латэране была ўстаноўлена яго бронзавая фігура, а самому манарху быў дараваны тытул ганаровага протаканоніка.

Традыцыя прыняцця гэтага тытула французскімі правіцелямі адрадзілася ў сярэдзіне ХХ ст. Ён надаваўся шасці Прэзідэнтам Францыі: Рэнэ Каці, Шарлю дэ Голю, Валеры Жыскару д’Эстэну, Жаку Шыраку і Нікаля Сарказі.