ПАПА

Святы Айцец: Божыя запаведзі – не абмежаванні, а скарб

Езус прапануе не сурагаты, а сапраўднае жыццё, сапраўдную любоў і сапраўднае багацце, падкрэсліў Францішак падчас агульнай аўдыенцыі, якая 13 чэрвеня 2018 г. прайшла ў Ватыкане.

Папа пачаў новы цыкл катэхез пра Божыя запаведзі. Спасылаючыся на евангельскае апавяданне пра сустрэчу Езуса з багатым юнаком (Мк 10,17-21), ён заўважыў, што і сёння вялікая колькасць людзей маладога ўзросту прагне напоўніцу пражыць сваё жыццё. Нярэдка, аднак, здараецца так, што яны нішчаць самі сябе, абіраючы ілюзіі. Папа звярнуў увагу таксама на іншую крайнасць – страх перад жыццём.

“[Я хацеў бы сказаць асабліва моладзі, што наш самы небяспечны вораг – гэта не канкрэтныя праблемы, якімі б сур’ёзнымі і драматычнымі яны не былі: самая вялікая небяспека ў жыцці, гэта злы дух прыстасавальніцтва, які не з’яўляецца ні лагоднасцю, ні пакорай, але павярхоўнасцю і маладушнасцю]”

- падкрэсліў Францішак.

“Трэба прасіць Нябеснага Айца аб дары здаровага неспакою для сучаснай моладзі. Калі маці і бацька бачаць юнака, які пасіўна сядзіць увесь дзень дома, што думаюць пра яго: “Ці не хворы ён?”, і вядуць яго да ўрача.... Ці не так? Жыццё маладога чалавека – гэта імкненне наперад, заклапочанасць, здаровы неспакой, здольнасць не згаджацца на жыццё без прыгажосці, без колеру. Калі маладыя людзі не будуць прагнуць сапраўднага жыцця, куды прыйдзе чалавецтва? Куды прыйдзе чалавецтва з пасіўнай, пазбаўленай неспакою моладдзю?”, - спытаў Папа.

Святы Айцец звярнуў увагу на ўпісаныя ў чалавечую прыроду абмежаванні, а таксама неабходнасць у педагагічным працэсе, які вядзе да пазнання самога сябе і таго, “чаго нам не хапае”. Ён падкрэсліў, што Езус прагнуў, каб багаты юнак не жыў выключна для сябе, але быў гатовы пакінуць усё і ісці за Ім. “Гэты чалавек павінен быў дайсці да парогу пэўнага пераходу, дзе адкрываецца магчымасць перастаць жыць самім сабой, сваімі справамі, сваімі дабротамі, і менавіта таму, што яму не хапае поўнага жыцця – пакінуць усё, каб пайсці за Панам”, - заўважыў Пантыфік.

“[Пры ўважлівым разглядзе, у апошнім закліку Езуса – вялікім, цудоўным – няма прапановы беднасці, але багацця, сапраўднага багацця: “Табе не хапае аднаго: ідзі, прадай усё, што маеш, і раздай убогім, і будзеш мець скарб у небе]”

- зазначыў Папа.

Паводле Святога Айца, гаворка вядзецца пра тое, каб зрабіць выбар на карысць “арыгіналу” жыцця, а не яго “копіі”. “Езус прапануе не сурагаты, а сапраўднае жыццё, сапраўдную любоў, сапраўднае багацце! Як зможа моладзь ісці за намі ў веры, калі не будзе бачыць, што мы выбіраем “арыгінал”, калі бачаць нас, прызвычаеных да паўмер. Кепска, калі сустракаеш хрысціян напалову, хрысціян – дазволю сабе сказаць – “карлікавых”, якія растуць толькі да пэўнай вышыні, а потым ужо не, хрысціян з абмежаваным, закрытым сэрцам. Кепска, калі сустракаеш такое. Патрэбны прыклад кагосьці, хто пакліча мяне выйсці “па-за”, “далей”, каб пакрысе ўзрастаць. Св. Ігнацый называў гэта “magis”, “полымем, руплівым дзеяннем, якое абуджае дрымотных”, - сказаў Папа.

Францішак патлумачыў, што ў рамках новага катэхетычнага цыклу Дзесяць запаведзяў будуць разглядацца праз прызму вучэння Езуса, “каб ідучы за Ім, прыйсці ад ілюзій маладосці да нябеснага скарбу”.

“Адкрыем у кожным з гэтых старажытных і мудрых законаў, браму, якую расчыніў Айцец, Які ёсць у Небе, каб Пан Езус, Які яе перайшоў, прывёў нас да сапраўднага жыцця. Яго жыцця. Жыцця Божых дзяцей”, - заклікаў Францішак на заканчэнне сваёй катэхезы.

Навіна ў фармаце аўдыё