Барталамей I: імя Льва XIV – добры знак для экуменізму
Аляксандр Амяльчэня - Vatican News
Выбар імя новага Папы Барталамей I расцаніў як станоўчы знак. Пра гэта ён заявіў 8 мая 2025 года падчас мерапрыемства ў Афінскім музеі. Ганаровы прадстаяцель праваслаўных хрысціян ва ўсім свеце адзначыў, што папярэднік новага Пантыфіка – Леў XIII, які займаў Пятроў Пасад з 1878 па 1903 год, быў вядомы сваім укладам у развіццё сацыяльнага вучэння і грамадскую дзейнасць Касцёла.
Адзінства, любоў, братэрства і супольны шлях
"Я спадзяюся, што разам з новым Папам мы зможам перадаць пасланне адзінства, любові, братэрства і супольнага шляху да будучыні Цэркваў, да будучыні хрысціянства", - сказаў іерарх.
Варта адзначыць, што ў 2013 годзе Барталамей I стаў першым за амаль тысячу гадоў Патрыярхам Канстантынопальскім, які прысутнічаў на інаўгурацыі пантыфікату Папы Францішка. 85-гадовы Патрыярх таксама ўзяў удзел у яго пахаванні ў канцы красавіка 2025 года.
Сумеснае святкаванне юбілею Нікейскага Сабора
Асаблівую ўвагу Барталамей I надае 1700-й гадавіне экуменічнага Нікейскага Сабора. Патрыярх хацеў бы адзначыць гэту падзею разам з новым Папам праз два тыдні ў гістарычным месцы ў Турцыі. "Я спадзяюся, што пераемнік Францішка зможа наведаць Нікею", - заявіў ён у канцы красавіка, яшчэ да выбрання новага Папы.
У эмацыйным пасланні пасля смерці Папы Францішка Барталамей I апісаў яго як "каштоўнага брата ў Хрысце" і "сапраўднага сябра праваслаўя". Гэтыя словы сведчаць пра той высокі ўзровень адносін паміж Касцёлам і Праваслаўнай Царквой, які склаўся за час папярэдняга пантыфікату.
