Папа Леў XIV: упершыню аўгустынец на Пятровым Пасадзе
Аляксандр Амяльчэня - Vatican News
Ордэн аўгустынцаў, да якога належыць новаабраны Папа, мае глыбокія гістарычныя карані і багатую духоўную спадчыну. "Ordo Fratrum Sancti Augustini" (OSA) чэрпае сваю духоўную арыентацыю ад Айца Касцёла Аўгустына Гіпонскага (354-430), які напісаў правілы манаскага жыцця, што лічацца найстарэйшымі ў заходнім хрысціянстве.
Духоўная традыцыя, якая фарміравала пакаленні
Афіцыйнае заснаванне сучаснага Ордэна адбылося ў 1256 годзе, калі Папа Аляксандр IV булай "Licet Ecclesiae" аб'яднаў некалькі пустэльніцкіх супольнасцей, якія ўжо жылі паводле правіл святога Аўгустына. Спачатку яны называліся "аўгустынцамі-пустэльнікамі", але пазней, у 1963 годзе, назва была скарочана да "аўгустынцаў", што лепш адлюстроўвала гарадскі характар ордэна.
"Чальцам Ордэна Папы даручылі сяліцца ў гарадах, а не ў адзіноце. Іх місія заключалася ў абвяшчэнні Божага слова праз пропаведзь і тлумачэнне Пісання, годнае правядзенне набажэнстваў і развіццё навукі і мастацтва," - адзначаецца ў матэрыяле аўстрыйскага каталіцкага агенцтва “Kathpress”.
Адметнасцю аўгустынцаў з'яўляецца роўнасць паміж святарамі і братамі ў ордэне. Апошнія маюць поўнае права голасу на капітулах і доступ да ўсіх пасад, што было даволі прагрэсіўным для свайго часу.
Сусветнае распаўсюджванне і знакамітыя прадстаўнікі
Ордэн хутка распаўсюдзіўся па ўсёй Еўропе. Ужо ў канцы XIII стагоддзя ён быў арганізаваны ў 24 правінцыі з кляштарамі ад Ірландыі да Кіпра. Асабліва важную ролю аўгустынцы адыгрывалі ў гарадской душпастырскай дзейнасці, адукацыі і навуцы.
"XVI стагоддзе было росквітам Ордэна. Ён налічваў каля 2000 мужчынскіх і 300 жаночых кляштараў з прыкладна 35 000 манахамі і манахінямі," - паведамляе “Kathpress”.
Сярод найбольш вядомых аўгустынцаў – Марцін Лютэр, які ўступіў у Ордэн у 1505 годзе, што значна паўплывала на яго рэфармацыйную дзейнасць. Таксама да Ордэна належалі містык Мікалай Талентынскі, тэолаг Эгідый Рымскі і Грэгар Мендэль – заснавальнік сучаснай генетыкі.
Аўгустынцы заўсёды адыгрывалі важную ролю ў развіцці адукацыі і навукі. Тамаш Страсбургскі як генеральны прыёр значна спрычыніўся да заснавання Венскага ўніверсітэта.
Сучасны стан Ордэна
Пасля цяжкіх крызісаў, выкліканых Рэфармацыяй, Асветніцтвам і секулярызацыяй, Ордэн значна скараціўся ў XIX стагоддзі. Аднаўленне пачалося толькі ў канцы XIX стагоддзя, асабліва ў Іспаніі, Бельгіі і Германіі.
Сёння аўгустынцы дзейнічаюць па ўсім свеце і налічваюць каля 2600 чальцоў, арганізаваных у 50 правінцый, вікарыятаў і дэлегатур. Яны займаюцца душпастырскай дзейнасцю, адукацыяй, місіянерскай працай і навуковымі даследаваннямі.
Абранне Папы Льва XIV з Ордэна аўгустынцаў падкрэслівае багатую разнастайнасць духоўных традыцый у Каталіцкім Касцёле і адкрывае новую старонку ў гісторыі папства, звязаную з духоўнай спадчынай святога Аўгустына.
