Рэакцыя епіскапату Беларусі на ваенныя дзеянні супраць Украіны
Аляксандр Амяльчэня - Vatican News
“Сёння раніцай свет скалыхнула трагічная навіна: паміж найбліжэйшымі да нас суседнімі краінамі распачаўся ваенны канфлікт. Здаровы розум і так моцна яшчэ жывая памяць пра наступствы падобных дзеянняў у гісторыі не сталіся эфектыўным стрымліваючым фактарам. Брат узняў руку на брата. Пачаў здзяйсняцца найгоршы сцэнар развязкі той напружанасці, якая ўжо доўгі час існавала паміж братнімі народамі. Так блізка, побач з намі, паміж Расіяй і Украінай, сярод блізкіх нам людзей пачалася вайна”, - гаворыцца ў пачатку тэксту.
Старшыня каталіцкага епіскапату Беларусі заклікаў да малітвы, як асабістай, так і ў парафіяльных супольнасцях, “аб Божай міласэрнасці і прабачэнні для нас, Божых дзяцей, якія не ўмеем мірна вырашаць нашыя непаразуменні і панаваць над сваімі хворымі амбіцыямі, аб спыненні братазабойчага канфлікту, які ва ўмовах сучаснай міжнароднай сітуацыі можа перарасці ў больш глабальную катастрофу”.
Таксама ён заахвоціў вернікаў “да посту і ахвяравання цярпенняў і пакутаў у гэтай інтэнцыі”.
“Божа, дай апамятацца гэтаму свету і спашлі яму свой спакой, свой Божы спакой!”, - такім заклікам завяршаецца адмысловы зварот ад імя Канферэнцыі Каталіцкіх Біскупаў у Беларусі.
