Бэта версія

Cerca

Vatican News
Ілюстрацыйнае фота Ілюстрацыйнае фота  (AFP or licensors)

Пантыфік ухваліў дэкрэты аб гераічнасці цнотаў

Папа Францішак ухваліў дэкрэты аб прызнанні гераічнасці цнотаў новых кандыдатаў да хвалы алтароў.

5 ліпеня 2018 г. Святы Айцец прыняў на аўдыенцыі кардынала Анджэла Амата, прэфекта Кангрэгацыі па справах Кананізацыі, і ўхваліў дэкрэты аб прызнанні гераічнасці цнотаў новых кандыдатаў да хвалы алтароў. Такім чынам адкрыта дарога да абвяшчэння іх святымі.

Узгаданыя дэкрэты тычацца Слугаў Божых: італьянскіх свецкіх вернікаў Пьетра дзі Вітале (1916-1940), Джорджыа Ла Піра (1904-1977) і Карла Акуціса (1991-2006), а таксама іспанскай свецкай верніцы Алесіі Гансалес-Барос і Гансалес (1971-1985).

Пьетра дзі Вітале пражыў усяго 23 гады. Вучыўся ў дыяцэзіяльнай духоўнай семінарыі Палерма і шмат часу прысвячаў ушанаванню Найсвяцейшага Сакрамэнту і пакланенню Беззаганнай Дзеве Марыі. З’яўляўся францішканскім тэрцыярыем і быў удзельнікам Руху свецкіх вернікаў “Каталіцкае дзеянне”. Заўчасна памёр з-за цяжкой хваробы.

Джорджыа Ла Піра вядомы, асабліва ў Італіі, як “святы мэр” Фларэнцыі. Кіраўніком гэтага горада ён быў у 1951-1957 гг. і ў 1961-1965 гг. Дадзеныя яму паўнамоцтвы выкарыстоўваў для барацьбы з сацыяльнай няроўнасцю, выкаранення беднасці і спрыяння інтэгральнаму развіццю кожнай асобы.

Карла Акуціс за сваё кароткае 15-гадовае жыццё стаў вядомым у свеце дзякуючы сваім надзвычайным здольнасцям у галіне інфарматыкі, якія ён выкарыстоўваў на карысць Каталіцкага Касцёла, прапаведваючы Евангелле на інтэрнэт-прасторах і ў сацыяльных сетках.

Іспанская дзяўчынка Алесія Гансалес-Барос і Гансалес адышла ў вечнасць у 14-гадовым узросце. Калі за год да смерці ў яе дыягнаставалі анкалагічнае захворванне, яна з поўнай пакорлівасцю прыняла волю Бога і ахвяравала свае пакуты за Каталіцкі Касцёл, за святога Яна Паўла II, тагачаснага Папу, і за іншых людзей. Памерла 5 снежня 1985 г.

Навіна ў фармаце аўдыё
06 ліпеня 2018, 15:29