ሊቀ ጳጳስ ፖል ጋላገር የሰላም ሂደትን ሃሳብ ህያው ማድረግ አለብን ማለታቸው ተገለጸ

የእዚህ ዝግጅት አቅራቢ መብራቱ ኃ/ጊዮርጊስ ቫቲካን

ሊቀ ጳጳስ ፖል ሪቻርድ ጋላገር የዩክሬን ፕሬዝዳንት ቮሎዲሚር ዘለንስኪ የተናገሩትን በማስታወስ “በዩክሬን ያለው ጦርነት በድርድር ጠረጴዛ ላይ ያበቃል” ብለዋል። በዚህ ምክንያት ሊቀ ጳጳስ ጋላገር በመቀጠል፣ የቅድስት መንበር ጥረት “በቶሎ ወደ ድርድር ጠረጴዛ ለመድረስ ያለመ ነው” ሲሉ ተናግሯል።

ቫቲካን ከሌሎች የውጭ አገራት እና የዓለም አቀፍ ድርጅቶች ጋር የምታደርገውን ግንኙነት በበላይነት የሚቆጣጠረው የቅድስት መንበር ጽሕፈት ቤት ዋና ፀሐፊ ይህን ያሉት የጣሊያን ጋዜጣ ላ ስታምፓ ረቡዕ ግንቦት 23/2015 በታተመው ቃለ ምልልስ ላይ ነው። በዩክሬን እየተካሄደ ያለውን ግጭት በተመለከተ ሊቀ ጳጳስ ጋላገር እንዳሉት ቅድስት መንበር የዩክሬን ሕዝብ ችግርና መከራ እንደምትገነዘብ ገልፀው የዲፕሎማሲው ሁኔታ ግን ውስብስብ መሆኑን ጠቁመዋል። "የሰላም ሂደትን ሀሳብ ህያው ማድረግ አለብን" ብለዋል።

ርእሰ ሊቃነ ጳጳሳት ፍራንችስኮስ የዩክሬይን እና የራሻ ጦርነት ከተጀመረ በኋላ ጉዳዩ በሰላም ብቻ እንዲፈታ የተለያዩ ጥረቶችን ማድረጋቸውን የገለጹት ሊቀ ጳጳስ ጋላገር የጣሊያን ካርዲናል ማትዮ ዙፒ ወደ ዩክሬን እና ሩሲያ ስለሚያደርጉት ተልእኮ የተጠየቁት ሊቀ ጳጳስ ጋላገር የተልእኮው ልዩ ጉዳዮች አሁንም እየተጠና እንደሚገኝ ገልጸው “በተመሳሳይ ጊዜ፣ ያንን ፍጥነት እያወቅን እንዲህ ላለው ረቂቅ ተልእኮ ተስፋ እናደርጋለን እንዲሁም እንጸልያለን፣ እናም ጊዜ በጣም አስፈላጊ ነው ብሏል።

ከቻይና እና ኢራን ጋር ያለው ግንኙነት

ሊቀ ጳጳሱ በግጭቱ ውስጥ የሌሎች ሀገራት ሚና በተለይም ሩሲያ ከቻይና እና ኢራን ጋር ስላላት ግንኙነት ለሚነሱ ጥያቄዎች ምላሽ ሰጥተዋል። “የመጀመሪያው ግምት የቅድስት መንበር አቋም የትኛውም አገር፣ የትኛውም ተዋንያን ይህንን ጦርነት ለማስቆም የተቻለውን ሁሉ ማድረግ እንዳለበት ነው። ሁሉም ይህንን እንዲያደርግ እናበረታታለን” ሲሉ ተናግሯል።

ስለ ሰብአዊ መብት የሚነሱ ጥያቄዎችን በተመለከተ ቅድስት መንበር በእነዚህ ጥያቄዎች ላይ ስትናገር “መላውን ዓለም አቀፉን ማኅበረሰብ” እንደሚመለከት ገልጿል። አንዳንድ መግለጫዎች በተወሰኑ ጥያቄዎች ላይ ልዩ ጠቀሜታ ሊኖራቸው ቢችሉም፣ ቅድስት መንበር “በአስጨናቂ መንገድ” እንደማትናገር ገልፀው ይልቁንም “በጣም አስቸጋሪ ሊሆንብን በሚችልበት ጊዜም በሩን ክፍት ማድረግ እንደሚመርጥ” አስረድተዋል።  በዚሁ ጊዜ የቅድስት መንበር ዋነኛ ጉዳይ “ለክርስቲያኖችና ለካቶሊክ ማኅበረሰቦች ደህንነት፣ ለነፃነታቸውና ለሕይወታቸው” መሆኑን ጠቁመዋል።

የመተማመን ፍላጎት

ቃለ መጠይቁ የተጠናቀቀው በእስራኤል እና በፍልስጤም ያለውን የፖለቲካ ሁኔታ በሚመለከት ተከታታይ ጥያቄዎችን በማንሳት ሲሆን ሊቀ ጳጳስ ጋላገር በአካባቢው እየጨመረ ያለው ብጥብጥ እንዳሳሰባቸው ገልጸዋል። "ይህ የፖለቲካ ሁኔታን ለማሻሻል ተጨማሪ እንቅፋት እየፈጠረ ያለ ይመስላል" ብለዋል።

ፍልስጤማውያን እና እስራኤላውያን የስራ መግባባት እንዲፈጥሩ "የበለጠ ፖለቲካዊ ፍላጎት ለማግኘት ተጨማሪ ስራ መሰራት አለበት" በማለት አጥብቀው ገልጸው "ልምድ እንደሚነግረን አብዛኛው ሰው የሚስማማው ይመስለኛል የሚያስፈልገው ትናንሽ ፖለቲካ ማካሄድ ነው ብሏል። ይህም የእጅ ምልክቶች፣ በራስ መተማመንን የሚገነቡ ምልክቶችን፣ እምነትን የማግኘት ፍልጎት። ዛሬ በአለም ላይ በአገሮች እና በመሪዎች መካከል የጠፋው መተማመን ነው እና መገንባት አለብን ብሏል። "በአሁኑ ጊዜ እኛ ያለን አይመስለኝም እናም አለም አቀፉ ማህበረሰብ በዚህ ላይ መስራት ያለበት ይመስለኛል" ካሉ በኋላ ቃለ መጠይቁን አጠናቋል።