ር.ሊ.ጳ ፍራንቸስኮስ የክርስቲያኖች ዕርቅ ወደ ሰላም የሚያመጣ መንገድ እና ጦርነት የሚያስቆም ነው ማለታቸው ተገለጸ!

ርዕሰ ሊቃነ ጳጳሳት ፍራንቸስኮ ከቁስጥንጥንያ ቅዱስ ፓትርያርክ ሊቀ ጳጳስ የልዑካን ቡድን ጋር ተገናኝተው ባደረጉት ንግግር እግዚአብሔርን አመስግነው ባለፉት ዓመታት ስላሳዩት ሁለንተናዊ እድገት፣ በተለይ በዓለማችን ላይ “ጨካኝና ትርጉም የለሽ ጦርነት” እየተጋረጠ ባለበት ወቅት ከተለያዩ ክርስቲያኖች ጋር መታረቅ እንደሚያስፈልግ አሳስበዋል።

የዚህ ዝግጅት አቅራቢ መብራቱ ኃ/ጊዮርጊስ ቫቲካን

“በርካታ ክርስቲያኖች እርስ በርሳቸው እየተፋለሙበት ባለው ጨካኝ እና ትርጉም የለሽ የጥቃት ጦርነት” መካከል ርዕሠ ሊቃነ ጳጳሳት ፍራንቸስኮስ “በተለያዩ ክርስቲያኖች መካከል የተደረገ እርቅ በግጭት ውስጥ ባሉ ሕዝቦች መካከል ሰላም እንዲሰፍን አስተዋፅዖ ለማድረግ ነው” ብለዋል ።

ቅዱስ አባታችን ሐሙስ ሰኔ 23/2014 ዓ.ም በቫቲካን ከተገኙት የቁስጥንጥንያ ፓትርያርክ ሊቀ ጳጳስ ልኡካን ጋር በቅዱስ ጴጥሮስ ወጳውሎስ በዓል ማግስት በተገናኙበት ወቅት ነበር ይህንን ጉዳይ አንስተው የተነጋገሩት።

የልዑካን ቡድኑ የረጅም ጊዜ ባህል በመከተል በካቶሊክ እና በኦርቶዶክስ አብያተ ክርስቲያናት መካከል ያለውን አንድነት ለመፍጠር በዚህ ሳምንት በሮም ይገኛሉ።

ጉብኝቱ የመጣው “ልማዳዊ በሆነ መልኩ የቅዱሳን ጴጥሮስ እና ጳውሎስ አመታዊ በዓል በሚከበርበት ወቅት እና ከእዚያም ቀጥሎ እ.አ.አ በእየአመቱ በሕዳር 30 ላይ በኢስታንቡል የሚከበረውን የሐዋርያው ​​ቅዱስ እንድርያስ በዓል" አስምልክቶ ሁለቱም የሃይማኖት ተቋማት ተወካዮቻቸውን በመላክ በተለያዩ ጉዳዮች ላይ ምክክር የሚያደርጉበትን ባሕል አጠናክረው እንደ ሚቀጥሉ አስታውቀዋል። 

ርእሰ ሊቃነ ጳጳሳቱ ሐሙስ ሰኔ 23/2014 ዓ.ም ማለዳ ላይ ተወካዮቹን በቫቲካን ተቀብለው “እንኳን ደህና መጣችሁ” በማለት ለጉብኝታቸው አድናቆታቸውን ገልፀው “ውድ ወንድማቸው” ለቅዱስ ፓትርያርክ በርተሎሜዎስ እና ለቅዱስ ሲኖዶስ ሰላምታ እንዲያደርሱላቸው ጠይቀዋል።

እ.አ.አ በሰኔ 29/2014 ዓ.ም የቅዱሳን ጴጥሮስ እና ጳውሎስ አመታዊ በዓል በተከበረበት ወቅት በቫቲካን በሚገኘው በቅዱስ ጴጥሮስ ባዚሊካ ውስጥ በተካሄደው መስዋዕተ ቅዳሴ ላይ ተወካዮቹ መገኘታቸውን ያስታወሱት ርዕሰ ሊቃነ ጳጳሳት ፍራንቸስኮስ መገኘታቸው ለእርሳቸውና ለምዕመኑ ሁሉ “ታላቅ ደስታ ነው” በማለት፣ “የቁስጥንጥንያ ቤተ ክርስቲያን ለሮም ቤተ ክርስቲያን ያላትን ቅርበት እና ወንድማማችነት የበጎ አድራጎት ተግባር ያሳያል” ብለዋል።

ወደ ሙሉ ሕብረት እድገት የሚደርገው ቁርጠኛ የሆነ አካሄድ

ቅዱስ አባታችን ርእሰ ሊቃነ ጳጳሳት አያይዘውም ሁለቱ አብያተ ክርስቲያናት የየአድባራቱን በዓል ለማክበር የልዑካን ቡድኖች ልውውጦችን ማድረጋቸው "የእርቀታችንና የቸልተኝነት ጊዜያት ክፍሎቻችን ሊጠገኑ እንደማይችሉ የሚቆጠርበት ጊዜ ያለፈበት ለመሆኑ ተጨባጭ ማሳያ ነው" ብለዋል።

“ዛሬ እግዚአብሔር ይመስገን የጌታችንን የኢየሱስ ክርስቶስን ፈቃድ በመታዘዝ እና በመንፈስ ቅዱስ መሪነት ቤተ ክርስቲያናችን ወንድማማችና ፍሬያማ የሆነ ውይይት በማድረግ አሳማኝ በሆነ እና በማይቀለበስ መንገድ ወደ ቀድሞው ተሃድሶ ለመሸጋገር ቆርጠዋል፣ ይህም ሙሉ ህብረት ለማምጣት ያስችላል" ብለዋል።

ይህንን ሂደት በጀመሩ ሰዎች ላይ በማሰላሰል ርዕሠ ሊቃነ ጳጳሳቱ “የማይረሱትን የማኅበረ ቅዱሳን ፓትርያርክ አቴናጎራስ” የሞቱበት 50ኛ ዓመት የምስረታ በዓል ሲቃረብ “ለእኔና ለብዙ ሌሎች የብርታት ምንጭ ሆኖ የቀጠለ ጥበበኛ እና ደፋር እረኛ ነበሩ” በማለት አስታውሰዋል።

እህት አብያተ ክርስቲያናት፣ ወንድም ሕዝቦች

በጦርነት ስቃይ ውስጥ ክርስቲያኖች መታረቅ እንዳለባቸው ቅዱስ አባታችን አስረድተዋል።

ዓለማችን ብዙና ብዙ ክርስቲያኖች እርስ በርስ እየተዋጉ ባሉበት ጨካኝና ትርጉም የለሽ የጥቃት ጦርነት ስላለ በተለያዩ ክርስቲያኖች መካከል የሚደረገው እርቅ በግጭት ውስጥ ባሉ ሕዝቦች መካከል ሰላም እንዲሰፍን አስተዋጾ ለማድረግ በአሁኑ ጊዜ በጣም ወቅታዊ ትኩረት ሊሰጠው የሚገባ ጉዳይ ነው ” ብለዋል።

“ከጦርነት ቅሌት በፊት” አሉ ርዕሰ ሊቃነ ጳጳሳቱ “የሚያሳስበን ነገር ማውራት እና መወያየት ሳይሆን ማልቀስ፣ ሌሎችን መርዳት እና ራሳችንን መለወጥ መሆን አለበት” ብለዋል።

" ለተጎጂዎች እና ለአስከፊ ደም መፋሰስ፣ ለብዙ ንፁሀን ዜጎች ሞት፣ በቤተሰብ፣ በከተማ እና በመላው ህዝብ ላይ ለደረሰው ጉዳት ማልቀስ አለብን" ብለዋል።

“ምን ያህል ስቃይ ደርሶባቸዋል” በማለት ዘመዶቻቸውን በሞት አጥተው ቤታቸውንና አገራቸውን ጥለው እንዲሰደዱ ተደርገዋል’” በማለት ስለ አውዳሚው ጦርነት ተናግረዋል።

"ወንድሞቻችንን እና እህቶቻችንን" መርዳት እንዳለብን እና "እንደ ክርስቲያኖች በተፈናቀሉት፣ በድሆች እና በቆሰሉት ውስጥ ለኢየሱስ ማሳየት ያለብንን በጎ አድራጎት ተግባር መለማመድ አለብን" በማለት የተናገሩ ሲሆን የትጥቅ ትግል በምንም መልኩ ከኢየሱስ እና ከጌታ መንግሥት ጋር ምንም ግንኙነት የላቸውም ብለዋል።

“ነገር ግን መንፈሳዊ ለውጥ ማምጣት አለብን፣ በትጥቅ የታገዘ ወረራ፣ መስፋፋት እና ኢምፔሪያሊዝም ኢየሱስ ካወጀው መንግሥት ጋር ምንም ግንኙነት እንደሌለው መገንዘብ አለብን” ያሉ ሲሆን እነዚህ ዝንባሌዎች “በጌቴሴማኒ ደቀ መዛሙርቱን ዓመፅን እንዲክዱ፣ ሰይፍም ወደ ቦታው እንዲመልሱ ከተናገረ ከሞት ከተነሣው ጌታ ጋር ምንም ግንኙነት እንደሌለው አበክሮ ተናግሯል፣ ምክንያቱም በሰይፍ የሚኖሩ በሰይፍ ይሞታሉና ሁሉም ጦርነት እና ግጭት ያብቃ ብለዋል።

ርዕሠ ሊቃነ ጳጳሳቱ የክርስትናን አንድነት መፈለግ “የአብያተ ክርስቲያናት ውስጣዊ ጥያቄ ብቻ አይደለም፣” ይልቁንም በፍትሕ እና ለሁሉም በአንድነት የሚገለጥ እውነተኛ ዓለም አቀፋዊ ወንድማማችነት እውን ለማድረግ አስፈላጊ ቅድመ ሁኔታ ነው” ብለዋል።

"እኛ ክርስቲያኖች በዚህ ጉዳይ ላይ በቁም ነገር ማሰብ አለብን" ብለዋል።

በክርስቶስ አማካይነት እንደ አዲስ መጀመር

ርዕሰ ሊቃነ ጳጳሳት ፍራንችስኮስ አብረዋቸው ያሉት በርካታ ጥያቄዎችን እንዲያሰላስሉ ጠይቀዋል።

"በዚህ አስከፊ የእርስ በርስ ግጭት እና ጦርነት ምክንያት ምን ዓይነት አለም እንዲመጣ ነው የምንፈልገው? እናም የበለጠ ወንድማማችነት ላለው የሰው ልጅ ምን ዓይነት አስተዋፅኦ ለማድረግ ተዘጋጅተናል?" ሲሉ ጥያቄ አንስተዋል።

እንደ አማኞች “ለእነዚህ ጥያቄዎች በወንጌል ውስጥ የግድ መልስ ማግኘት አለብን፡- መሐሪ እንድንሆንና ሁልጊዜም ዓመፀኛ እንዳንሆን በሚጠራን በኢየሱስ፣ አብ ፍጹም እንደ ሆነ ዓለምን እንዳንመስል ፍጹም እንድንሆን ነው የሚጠይቀን" ብለዋል።

ርዕሠ ሊቃነ ጳጳሳት ፍራንችስኮስ “ውድ ወንድሞች ሆይ፣ እርስ በርሳችን እንረዳዳ፣ በዚህ ዓለም ማታለያዎች የወንጌልን አዲስነት ለማዳፈን ለሚደረገው ፈተና አንሸነፍ” በማለት አበረታተዋል። የሁሉም ሰው አባት የሆነው እግዚአብሄር ‘በክፉዎችና በበጎዎች ላይ ፀሐይን ያወጣ፣ በጻድቃንና በኃጢአተኞችም ላይ ዝናቡን የሚያዘንብ አምላክ ስለሆነ ከርሱ ጋር ልንተባበር ይገባናል ብለዋል።

“ክርስቶስ ሰላማችን ነው” ያሉት ርእሰ ሊቃነ ጳጳሳቱ “እርሱ ሥጋ መልበሱ፣ ሞትና ትንሣኤ ለሁሉ፤ በሰዎች መካከል ያለውን የጥል እና የልዩነት ግንቦችን አፈራርሷል” ያሉ ሲሆን ከእርሱ ጋር በአዲስ መልክ ሁሉንም ነገር መጀመር ይኖርብናል ብለዋል።

የተስፋ ምልክት

ርዕሰ ሊቃነ ጳጳሳቱ ወደ ሙሉ ሕብረት ለመመለስ በሚደረገው ጉዞ የተስፋ ምልክት ሆኖ በካቶሊክ ቤተክርስቲያን እና በኦርቶዶክስ ቤተ ክርስቲያን መካከል የተደረገውን የጋራ ዓለም አቀፍ የነገረ መለኮት ውይይት አስተባባሪ ኮሚቴ ስብሰባ በወረርሽኙ ለሁለት ዓመታት ከተቋረጠ በኋላ ባለፈው ግንቦት ወር መጀመሩን ቅዱስነታቸው መልካም ጅምር ነው ብለዋል።

"እርስ በርሳችን አንዱ ለአንዱ ይጸልይ፣ እርስ በርሳችን እንስራ እና ወደ ኢየሱስና ወደ ወንጌሉ በመመልከት እርስ በርሳችን እንረዳዳ" በማለት ሥነ-መለኮታዊው ውይይት አዲስ አስተሳሰብን በማሳደግ እንደሚሻሻል ተስፋ አደርጋለሁ” ብለዋል።

ርዕሠ ሊቃነ ጳጳሳት ፍራንችስኮስ “ቅዱሳን ወንድሞቻችን ጴጥሮስ እና እንድርያስ ያማልዱናል እናም በአንድነት እና በመላው አለም በምናደርገው ጉዞ የእግዚአብሔርን በረከት እናገኝ ዘንድ የቸሩ አባታችን ፈቃድ ይሁን” በማለት ጸሎታቸውን አጠቃለዋል።