ር. ሊ. ጳ ፍራንችስኮስ፣ ታሪክ እራሱን ዛሬ በዩክሬን መድገሙን ገለጹ

የዚህ ዝግጅት አቅራቢ ዮሐንስ መኰንን - ቫቲካን

ርዕሠ ሊቃነ ጳጳሳት ፍራንችስኮስ ዛሬ ባቀረቡት ሳምንታዊ የጠቅላላ ትምህርተ ክርስቶስ አስተምህሮአቸው፣ በዩክሬን እየተካሄደ ያለውን ጦርነት በማስመልከት ታዳሚዎችን በድጋሚ አስታውሰዋል። "ታሪክ እራሱን ዛሬም ይደግማል!" ያሉት ር. ሊ. ጳ ፍራንችስኮስ፣ በፖላንድ ሉብሊን ከተማ በሚገኝ ካቶሊክ ዩኒቨርሲቲ ማዕከል፣ የካቶሊክ እና የአይሁድ እምነቶች ግንኙነት ምሥረታን አስመልክት በተዘጋጀው በዓል ላይ ለተገኙት የፖላንድ ምዕመናን መልዕክት ማስተላለፋቸውን ገልጸዋል። የመታሰቢያ በዓሉ በሁለተኛው የዓለም ጦርነት ወቅት ናዚዎች በፖላንድ አይሁዶች ላይ ያካሄዱት የጭፍጨፋ ተግባርንም ማስታወሱ ታውቋል።

የሁለተኛው የዓለም ጦርነት አስፈሪነት

እ. አ. አ. በ 1942 እና በ 1943 መካከል ያለው የዕቅዱ አፈፃፀም ናዚዎች በጀርመን የአይሁድ ሕዝብ ላይ የዘር ማጥፋት ወንጀል ለመፈጸም ያደረገውን ሙከራ አስከፊነት የሚያሳይ እንደ ነበር ተገልጿል። በአጠቃላይ 1.7 ሚሊዮን የሚጠጉ አይሁዶች በቤልዜክ፣ በሶቢቦር እና በትሬብሊንካ የማጎሪያ ካምፖች ውስጥ በጅምላ መገደላቸው ይታወሳል። በራይንሃርድ ካምፖች ላይ በተደረገው ኦፕሬሽን ቁጥራቸው በውል የማይታወቁ የፖላንድ፣ የሮማ እና የሶቪየት የጦር እስረኞች ሰለባ መሆናቸው ይታወሳል። ርዕሠ ሊቃነ ጳጳሳት ፍራንችስኮስ ለታዳሚዎቹ ባሰሙት ንግግርም፥ የዚህ አሰቃቂ ክስተት ትውስታ የሰላም ውሳኔዎችን እና እርምጃዎችን ሊያነሳሳ ይገባል ብለዋል።

በስቃይ ውስጥ ለምትገኝ ዩክሬን የሚደረግ ጸሎት

ርዕሠ ሊቃነ ጳጳሳት ፍራንችስኮስ ከዚህም በተጨማሪ ከጣሊያን ልዩ ልዩ ሀገር ስብከቶች ለመጡት መንፈስዊ ነጋዲያን ባደረጉት የሰላምታ ንግግራቸው በዩክሬን በመካሄድ ላይ የሚገኘው ጦርነት አስከፊነት ተናግረዋል።የላቲን የአምልኮ ሥርዓት በሚከተሉ ካቶሊክ ምዕመናን ዘንድ ሐሙስ ኅዳር 29/2015 ዓ. ም. የሚከበረውን የንጽሕት እመቤታችን ቅድስት ድንግል ማርያም ዓመታዊ ክብረ በዓል ያስታወሱት ቅዱስነታቸው፣ በጦርነት ስቃይ ውስጥ ለሚገኝ የዩክሬን ሕዝብ የእግዚአብሔር እናት እመቤታችን ቅድስት ድንግል ማርያም እንድታጽናናቸው እንዲጸልዩ ጠይቀዋል።