ር.ሊ.ጳ ፍራንቸስኮስ ለደቡብ ሱዳን መሪዎች ‘እግዚአብሔርን በጠላቶቻችሁ ውስጥ እዩ’ ማለታቸው ተገለጸ

ርዕሰ ሊቃነ ጳጳሳት ፍራንቸስኮስ የካንተርበሪ ሊቀ ጳጳስ እና የስኮትላንድ ቤተክርስቲያን ኃላፊ ለደቡብ ሱዳን የፖለቲካ መሪዎች የይቅርታ እና የነጻነት ጎዳና እንዲጓዙ የፋሲካ ሰላምታ ልከዋል።

የዚህ ዝግጅት አቅራቢ መብራቱ ኃ/ጊዮርጊስ ቫቲካን

ርዕሰ ሊቃነ ጳጳሳት ፍራንቸስኮስ፣ ሊቀ ጳጳስ ጀስቲን ዌልቢ እና ክቡር ጂም ዋላስ የትንሳኤውን በዓል ባከበሩበት ወቅት ባስተላለፉት የጋራ መልእክት የደቡብ ሱዳን መሪዎች ለእርቅ፣ ለወደፊት ሰላም እና ወንድማማችነት እንዲሰሩ ጋብዘዋል።

ርዕሰ ሊቃነ ጳጳሳቱ በግንቦት ወር ክቡር ጂም ዋላስን የሚተኩት ክቡር ዶ/ር ኢየን ኤም ግሪንሺልድስን በመያዝ ከካንተርበሪ ሊቀ ጳጳስ እና የስኮትላንድ ቤተ ክርስቲያን ኃላፊ ጋር በመሆን በሐምሌ ወር ወደ ደቡብ ሱዳን ሊጓዙ እየተሰናዱ መሆኑ ይታወቃል። "በዚህ የትንሳኤ ሰሞን፣ አዲስ መንገድ የሚቻል መሆኑን የሚያሳየን የኢየሱስ ክርስቶስን ትንሳኤ ስናከብር ደስታችንን እናካፍላችሁ" በማለት በመልእክቱ ውስጥ ተጠቅሷል።

"በጠላቶቻችን ውስጥ እንኳን እግዚአብሔርን እርስ በርሳችን እንድንመለከት የሚያስችለን የይቅርታ እና የነፃነት መንገድ" ከሙታን የተነሳው ጌታ እንዲሰጠን ልንጸልይ ይገባል ያሉ ሲሆን ይህ መንገድ ወደ አዲስ ሕይወት ይመራል፣ መልእክቱ "ለእኛ በግለሰብ ደረጃም ሆነ ለምንመራቸው" ሰዎች ሰላም እና ብልግና ያመጣል ብለዋል።

“በአሁኑ ጊዜ በፈተናዎች እና በትግሎች መካከል አዳዲስ መንገዶችን ለመለየት በዚህ መንገድ እንደገና እንዲቀበሉ” ለመሪዎቹ የምናደርገውን ጸሎታችንን እንቀጥላለን በማለት በጋራ ባስተላለፉት መልእክት የጠቀሱ ሲሆን "እኛም ህዝቦቻችሁ በእናንተ አመራር አማካኝነት የትንሳኤውን ተስፋ እንዲለማመዱ እንጸልያለን" ብለዋል።

በማጠቃለያም በመጪው ክረምት የሰላም ጉዞአቸውን በመጠባበቅ ደቡብ ሱዳንን ለመጎብኘት እንደሚጓጉ ተናግረዋል።

የዓለማችን አዲሲቷ ሀገር

የደቡብ ሱዳን ሪፐብሊክ እ.አ.አ በሐምሌ 2011 ዓ.ም ከሱዳን ነፃነቷን ያገኘች የአለማችን አዲሲቷ ሀገር ነች።

ከነጻነት በኋላ ግን ሀገሪቱ ትክክለኛ የአስተዳደር ስርዓት ለመዘርጋት ስትታገል የነበረች ሲሆን የተለያዩ ፈተናዎችም ተጋርጠውባታል፤ ለምሳሌ የፖለቲካ ግጭቶች፣ ሙስና እና የጋራ ግጭቶች።

እ.ኤ.አ. በ2013 በፕሬዚዳንት ሳልቫ ኪር ታማኝ ኃይሎች እና በምክትል ፕሬዝዳንቱ ሪየክ ማቻር ታማኝ ኃይሎች መካከል ግጭት ተቀሰቀሰ። ጦርነቱ በፍጥነት በመላ አገሪቱ በመስፋፋቱ በጎሳ በመስፋፋት በአስር ሺዎች የሚቆጠሩ ዜጎችን ገድሎ ሰብዓዊ ቀውስ አስከትሏል፣ በሚሊዮኖች የሚቆጠሩ ተፈናቅለው እርዳታ ያስፈልጋቸዋል።

እ.አ.አ በ2020 ዓ.ም ጥምር መንግስት እንዲመሰረት ያስቻሉ ተከታታይ የሰላም ስምምነቶች የተካሄዱ ቢሆንም ሀገሪቱ ግን በፓርቲዎች መካከል ጠላትነት እየቀጠለ በመሆኑ ሙሉ በሙሉ ተግባራዊ ያልተደረገውን ስምምነት ተግባራዊ በማድረግ የሚገጥሙትን መሰናክሎች ለማስወገድ እየታገለች ትገኛለች።

ርዕሰ ሊቃነ ጳጳሳት ፍራንቸስኮስ በተፋላሚዎቹ የደቡብ ሱዳን ወገኖች መካከል እርቅ እንዲወርድ ደጋግመው የጠየቁ ሲሆን እ.ኤ.አ. ሚያዝያ 2019 ዓ.ም የደቡብ ሱዳን መሪዎችን በቫቲካን ለሁለት ቀናት የሚቆይ መንፈሳዊ ቆይታ እንዲያደርጉ ሁኔታዎችን አመቻችተው እንደ ነበረም ይታወሳል።