ፈልግ

Vatican News

ር.ሊ.ጳ ፍራንቸስኮስ በጣም በተጨናነቅንበት ጊዜ እንኳን ሳይቀር ጸሎት መጸለይ ችላ ማለት የለብንም አሉ!

ርዕሰ ሊቃነ ጳጳሳት ፍራንቸስኮስ ዘወትር እሁድ እለት በቫቲካን በሚገኘው በቅዱስ ጴጥሮስ አደባባይ ለሚሰበሰቡ ምዕመናን በእለቱ ቅዱስ ወንጌል ላይ ተንተርሰው የቅዱስ ወንጌል አስተንትኖ እንደ ሚያደርጉ የሚታወቅ ሲሆን በዚህ መሰረት ቅዱስነታቸው በኅዳር 19/2014 ዓ.ም ባደረጉት አስተንትኖ ሁልጊዜም ቢሆን ነቅተን እና በጸሎት ተግተን መኖር ይኖርብናል ማለታቸው ተገልጿል። የጎሮጎርሳዊያኑን የቀን አቆጣጠር በሚከተሉ የካቶሊክ ቤተክርስቲያን ምዕመና ዘንድ በእለቱ ማለትም በኅዳር 19/2014 ዓ.ም የጌታችን የኢየሱስ ክርስቶስ መወለድ የምንጠባበቅበት እና የገና በዓል ከመከበሩ በፊት ያለው የስብከተ ገና ወቅት መጀመሩን ከግምት ባስገባ መልኩ ቅዱስነታቸው ባደረጉት አስተንትኖ በጣም በተጨናነቅንበት ጊዜ እንኳን ሳይቀር ጸሎትን ችላ ማለት የለብንም ማለታቸው ተገልጿል።

የዚህ ዝግጅት አቅራቢ መብራቱ ኃ/ጊዮርጊስ ቫቲካን

ክቡራን እና ክቡራት የዝግጅቶቻችን ተከታታዮች ርዕሰ ሊቃነ ጳጳሳት ፍራንቸስኮስ በእለቱ ያደረጉትን አስተንትኖ ሙሉ ይዘቱን እንደሚከተለው አሰናድተነዋል እንድትከታተሉን ከወዲሁ እንጋብዛለን።

የተወደዳችሁ ወንድሞቼ እና እህቶቼ እንደምን አረፈዳችሁ!

በዛሬው የስብከተ ገና የመጀመሪያ እሁድ ሥርዓተ አምልኮ ላይ የተነበበው ቅዱስ ወንጌል በመጨረሻ ጊዜ ጌታ በድጋሚ እንዴት እንደ ሚመጣ ይናገራል (ሉቃስ 21፡25-28, 34-36) ። ኢየሱስ አስከፊ እና አስጨናቂ ሁኔታዎችን ተናግሯል፣ነገር ግን በትክክል በእዚያን ጊዜ እንዳንፈራ ጋብዞናል። ለምን? ምክንያቱም ሁሉም ነገር ደህና ሰለሚሆን ነው ወይ? አይደለም፣ ግን እርሱ ስለሚመጣ ነው። ኢየሱስ በገባው ቃል መሰረት ተመልሶ ይመጣል። “እናንተም እነዚህ ነገሮች መፈጸም ሲጀምሩ፣ መዳናችሁ ስለ ተቃረበ፣ ቀጥ ብላችሁ ቁሙ፤ ራሳችሁንም ወደ ላይ ቀና አድርጉ” (ሉቃስ 21፡28) ያለው በዚህ ምክንያ ነው። ይህን የሚያበረታታ ቃል መስማት ጥሩ ነው፡ ቀጥ ብለን እንቁምና ራሳችንን ወደ ላይ አናንሳ ምክንያቱም ልክ በእነዚያ ጊዜያት ሁሉም ነገር የሚያበቃ በሚመስልበት ጊዜ ጌታ እኛን ለማዳን ይመጣልና። በመከራዎች መካከል፣ በህይወት ቀውሶች እና በታሪክ አስደናቂ ክስተቶች ጊዜ፣ በደስታ እንጠባበቀዋለን። እሱን እንጠባበቃለን።

ነገር ግን ራሳችንን ወደ ላይ ቀና አድርገን በችግር፣ በመከራና በሽንፈት የማንዋጠው እንዴት ነው? ኢየሱስ መንገዱን በጠንካራ ማሳሰቢያ አመልክቷል፡- “ያ ቀን እንደ ወጥመድ ድንገት እንዳይደርስባችሁ ተጠንቀቁ፤…  ሁል ጊዜ ተግታችሁ ጸልዩ” ( ሉቃስ 21:34, 36 ) ይለናል።

"ንቁ ሁን": ንቁ። በዚህ አስፈላጊ የክርስትና ሕይወት ገጽታ ላይ እናተኩር። ከክርስቶስ ቃላት አኳያ ስንመለከት ንቃት ከንቃተ ህሊና ጋር የተቆራኘ መሆኑን እናያለን፡ ንቁ፣ አትዘናጉ፣ ማለትም ንቁ ተግታችሁ ጠብቁ ማለት ነው! ንቁነት ይህ ማለት ልባችን ሰነፍ እንዲሆን ወይም መንፈሳዊ ሕይወታችን ወደ መካከለኛነት ተለውጦ እንዲለሰልስ አለመፍቀድ ማለት ነው። “አንቅልፋም ክርስቲያኖች” እንዳንሆን ተጠንቀቁ - እናም ብዙ ክርስቲያኖች በእንቅልፍ ላይ ያሉ፣ በመንፈሳዊ ዓለማዊነት ደንዝዘው - ክርስቲያኖች መንፈሳዊ ግለት የሌላቸው፣ በጸሎት የማይተጉ፣ ለተልእኮ ጉጉት፣ ለወንጌል ፍቅር የሌላቸው ክርስቲያኖች እንዳሉ እናውቃለን። ሁል ጊዜ ወደ ውስጥ የሚመለከቱ፣ አድማሱን ማየት የማይችሉ ክርስቲያኖች እንዳሉ እናውቃለን። ይህ ደግሞ ወደ “ማሸለብ” ይመራል፡ ነገሮችን በንቃተ-ህሊና ማንቀሳቀስ፣ በግዴለሽነት መውደቅ፣ ለእኛ ከሚመቸን በስተቀር ለሁሉም ነገር ደንታ ቢስ መሆን ያስከትላል። ደስታ ስለሌለ ይህ በዚህ መንገድ ወደፊት የሚሄድ አሳዛኝ ሕይወት ይሆናል።

የእለት ተእለት ህይወታችን መደበኛ እንዳይሆን ነቅተን መጠበቅ አለብን፣ እናም ኢየሱስ እንደተናገረው፣ ስለዚህ በህይወት ጭንቀቶች ሸክም ውስጥ ገብተን እንዳንባዝን መጠንቀቅ ይኖርብናል። ስለዚህ ዛሬ እራሳችንን ለመጠየቅ ጥሩ ጊዜ ነው፣ በልቤ ላይ ምን ዓይነት ክብደት አለ? በመንፈሴ ላይ ምን ዓይነት ክብደት አለ? በሰነፍ ወንበር ላይ እንድቀመጥ የሚያደርገኝ ምንድን ነው? ክርስቲያኖችን “በመቀመጫ ወንበር” ላይ ሁልጊዜ ተቀምጠው ማየት በጣም ያሳዝናል! ሽባ የሚያደርገኝ ፣መሬት ላይ ጠፍረው የሚይዙኝ እና ጭንቅላቴን እንዳላነሳ የሚከለክሉኝ መጥፎ ድርጊቶች ምንድን ናቸው? እናም በወንድሞቻችን እና በእህቶቻችን ትከሻ ላይ የሚቀመጡ ሸክሞችን በተመለከተ እኔ አውቃቸዋለሁ ወይስ ለእነሱ ደንታ ቢስ ነኝ? እነዚህ እራሳችንን ልንጠይቅ የሚገቡ ጥሩ ጥያቄዎች ናቸው፣ ምክንያቱም ልባችንን ከግድየለሽነት ለመጠበቅ ይረዳሉ። ታዲያ ግዴለሽነት ምንድን ነው? የመንፈሳዊ ህይወት እና የክርስትና ህይወትም ትልቅ ጠላት ነው። ግድየለሽነት ወደ ሀዘን እንድንገባ የሚያደርግ ፣የህይወት ጥማትን እና ነገሮችን ለመስራት ፍላጎትን እንድናጣ የሚያደርግ የስንፍና አይነት ነው። ነፍስን በግዴለሽነት አጥምዶ ደስታዋን የሚሰርቅ አሉታዊ መንፈስ ነው። ደስታ እንዳይኖር በሐዘን ወደ ታች መውረድ እንጀምራለን። የምሳሌ መጽሐፍ እንዲህ ይላል፡- “በፍፁም ጥንቃቄ ልብህን ጠብቅ የሕይወት ምንጮች በእርሱ ናቸውና” ( ምሳ 4፡23 ) ይለናል። ልብህን ጠብቅ፣ ንቁ መሆን ማለት ይህ ነው! ነቅተህ ልብህን ጠብቅ።

እናም አንድ አስፈላጊ ንጥረ ነገር እንጨምር፡ የመንቃት ምስጢር ጸሎት ነው። እንዲያውም ኢየሱስ እንዲህ አለ፡- “ሁልጊዜ ንቁና ጸልዩ” (ሉቃስ 21፡36)። ጸሎት የልብ መብራት እንዲበራ የሚያደርግ ነው። ይህ በተለይ ፍቅራችን የቀነሰ እንደሆነ ሲሰማን እውነት ነው። ጸሎት እንደገና ያበራል፣ ምክንያቱም ወደ እግዚአብሔር፣ ወደ ነገሮች ማእከል ይመልሰናል። ጸሎት ነፍስን ከእንቅልፍ ያነቃቃታል እና በአስፈላጊ ነገሮች ላይ ያተኩራል ፣ በሕልውና ዓላማ ላይ ትኩረት እንድናደርግ ይጋብዘናል። በጣም በተጨናነቅንበት ጊዜ እንኳን ጸሎትን ችላ ማለት የለብንም። ብዙውን ጊዜ አጭር ልመናዎችን በመድገም የልብ ጸሎት ሊጠቅመን ይችላል። ለምሳሌ በስብከተ ገና ወቅት “ጌታ ኢየሱስ ሆይ ና” የማለትን ልማድ ልናዳብር እንችላለን። እነዚህን ቃላት ብቻ እየደጋገሙ "ጌታ ኢየሱስ ሆይ ና" ማለት ስንጀምር እርሱ ወደ እኛ መቅረብ ይጀምራል፣ ይህ የስብከተ ገና ወቅት ለዝግጅት የሚሆነን ምርጥ ጊዜ ነው። ስለ ልደት ትእይንት እና ገናን እናስባለን፣ ስለዚህ ከልባችን “ጌታ ኢየሱስ ሆይ ና” እንበል። ይህንን ጸሎት ቀኑን ሙሉ እንድግመው፡ ነፍስ ንቁ ትሆናለች! "ጌታ ኢየሱስ ሆይ ና" ሁላችንም አንድ ላይ ሆነን ሦስት ጊዜ እንዲህ በማለት እንጸልይ። "ጌታ ኢየሱስ ሆይ ና"! "ጌታ ኢየሱስ ሆይ ና"! "ጌታ ኢየሱስ ሆይ ና"!

እናም አሁን ወደ እምቤታችን ቅድስት ድንግል ማርያም እንጸልያለን። እርሷ የጌታን መምጣት በነቃ ልብ እንደ ጠበቀች ሁሉ እኛም በዚሁ መልክ መኖር እንችል ዘንድ የስብከተ ገና ወቅት ጉዞዋችንን በአማላጅነቷ ታብራልን።

28 November 2021, 12:36

የገብርኤል ብሥራት ጥንታዊ መሠርት የያዘና የጌታችን እየሱስ ክርስቶስን ሰው መሆን በማስታወስ በቀን ሦስት ጊዜ ማለትም በንጋት (በአስራሁለት ሰዓት) በቀትር (በስድስት ሰዓት) እንዲሁም በማታ (በአስራሁለት ሰዓት) የሚደገም የጸሎት ዓይነት ሲሆን ጸሎቱ በሚደገምበት ሰዓት ቤተ ክርስቲያንም የመልኣከ እግዚኣብሔርን ደወል በዚሁ ሰዓት ትደውላለች። ይህ ጸሎት መልኣከ እግዚኣብሔር የሚለውን ስያሜ ያገኝው ከጸሎቱ ከመጀመሪያ ስንኝ የእግዚኣብሔር መልኣከ ማርያምን አበሠራት ከሚለው የተወሰደ ሲሆን ጸሎቱ ስለ ጌታችን እየሱስ ክርስቶስ ሰው መሆን ይናገራል። ጸሎቱ በሦስት የተከፈሉ አጫጭር ስንኞች ሲኖሩት በእነኚህ በሦስት አጫጭር ስንኞች መሓል ጸጋን የተሞላሽ የሚለው የማርያም ጸሎት ይደገማል። ይህ ጸሎት በሰንበትና በበዓላት ዕለት ልክ በእኩለ ቀን ላይ በዕለቱ ወንጌል ላይ ትንሽ አስተምሮና ገለፃ ከሰጡ በኋላ ርዕሰ ሊቃነ ጳጳሳት በቅዱስ ጴጥሮስ ኣደባባይ ላይ ይህንን ጸሎት ይመራሉ። በመቀጠልም በአደባባዩ ላይ የተገኝው ከተለያየ ቦታ ለንግደት የመጣውን ሕዝብ ሰላምታ ይሰጣሉ።በየትኛውም ጊዜ ከበዓለ ፋሲካ እስከ በዓለ ጰራቅሊጦስ በመልኣከ እግዚኣብሔር ጸሎት ፈንታ የጌታችን እየሱስ ክርስቶስን ትንሣኤ የሚዘክረውን “የሰማይ ንግሥት ሆይ ደስ ይበልሽ” የሚለው ጸሎት የሚደገም ሲሆን በመሓል በመሓሉ ጸጋን የተሞላሽ ማርያም ሆይ የሚለው ጸሎት ይታከልበታል።

መልኣኩ ገብርኤል ማሪያምን አበሰራት የሚለው የቀርብ ጊዜ ጸሎት

ሁሉንም ያንብቡ >