Vatican News

ር.ሊ.ጳ ፍራንቸስኮስ ኢየሱስ የዘላለምን ሕይወት የሚያስገኘው እውነተኛ የሕይወት እንጀራ ነው አሉ!

ርዕሰ ሊቃነ ጳጳሳት ፍራንቸስኮስ ዘወትር ረቡዕ እለት በቫቲካን በሚገኘው በቅዱስ ጴጥሮስ አደባባይ ለሚሰበሰቡ ምዕመናን በእለቱ ቅዱስ ወንጌል ላይ ተንተርሰው አስተንትኖ እንደ ሚያደርጉ የሚታወቅ ሲሆን በዚህ መሰረት ቅዱስነታቸው በነሐሴ 16/2013 ዓ.ም ያደረጉት አስተንትኖ በእለቱ ከዮሐንስ ወንጌል 6፡60-69 ላይ ተወስዶ በተነበበው እና ኢየሱስ “ከሰማይ የወረደ እንጀራ እኔ ነኝ” በማለቱ የተነሳ ሕዝቡ ማጉረምረም እንደ ጀመሩ፣ በዚህ ምክንያት የተነሳ ብዙ ደቀ መዛሙርት ኢየሱስን መከተል መተዋቸውን በሚገልጸው የቅዱስ ወንጌል ክፍል ላይ መሰረቱን ያደርገ አስተንትኖ እንደ ነበረ እየተገለጸ ሲሆን “ኢየሱስ የዘላለምን ሕይወት የሚያስገኘው እውነተኛ የሕይወት እንጀራ ነው" ማለታቸው ተገልጿል።

የዚህ ዝግጅት አቅራቢ መብራቱ ኃ/ጊዮርጊስ ቫቲካን

ክቡራን እና ክቡራት የዝግጅቶቻችን ተከታታዮች ርዕሰ ሊቃነ ጳጳሳት ፍራንቸስኮስ በወቅቱ ያደረጉትን አስተንትኖ ሙሉ ይዘቱን እንደ ሚከተለው አሰናድተነዋል፣ ተከታተሉን።

የተወደዳችሁ ወንድሞቼ እና እህቶቼ እንደምን አረፈዳችሁ!

በዛሬው እለት የስርዓተ አምልኮ የተነበበልን ቅዱስ ወንጌል (ዮሐ 6፡60-69) ኢየሱስ እንጀራውን ባርኮ አምስት ሺህ ሕዝብ መመገቡን ተከትሎ ኢየሱስ የተናገረው ንግግር የሕዝቡን እና የደቀ መዛሙርቱን ምላሽ ያሳየናል። ኢየሱስ ያንን ምልክት እየተረጎመ እውነተኛ እንጀራ ከሰማይ የወረደ የሕይወት እንጀራ በሆነው በእርሱ እንዲያምኑ ጋበዛቸው። የሚሰጠውም እንጀራው ሥጋውና ደሙ መሆኑን ገለጠ። እነዚህ ቃላት በሰዎች ጆሮዎች ውስጥ ከባድ እና ለመረዳት የማይቻሉ ይመስላሉ ፣ ስለዚህ ከዚያ ቅጽበት ጀምሮ ቅዱስ ወንጌል እንደ ሚለን ብዙ ደቀ መዛሙርቱ እርሱን ትተውት ወደ ኋላ ይመለሳሉ። ማለትም መምህሩን መከተል ያቆማሉ (ዮሐንስ 6፡60-66)። ከዚያም ኢየሱስ ዐሥራ ሁለቱን “እናንተም ልትሄዱ ትፈልጋላችሁን?” ሲል ጠየቃቸው። (ዮሐንስ 6፡ 67) ጴጥሮስም መላውን ቡድን በመወከል “ጌታ ሆይ ፣ ወደ ማን እንሄዳለን? አንተ የዘላለም ሕይወት ቃል አለህና ፤ አንተም የእግዚአብሔር ቅዱስ እንደ ሆንህ አምነናል አውቀናልም ”(ዮሐ 6 68-69) በማለት ከእሱ ጋር ለመቆየት መወሰናቸውን አረጋግጧል። ይህ ደግሞ እጅግ በጣም የሚማርክ የእምነት መግለጫ ነው።

እንግዲህ ኢየሱስን የተውትንና ያልተከተሉትን ሰዎች አመለካከት በአጭሩ እንመልከት። ይህ አለማመን ከየት ይመነጫል? የዚህ ውድቅ ምክንያት ምንድነው?

የኢየሱስ ቃላት ታላቅ ድንጋጤን አስከትሏል - እርሱ እግዚአብሔር ራሱን ለመግለጥ እና በሰው ሥጋ ድክመት ውስጥ ድነትን ለማከናወን ወስኗል ማለቱ ነበር። ቃል ስጋ የለበሰበት ምስጢር ነው። የእግዚአብሔር ልጅ ቃል የነበረው ሥጋ በመልበሱን ተከትሎ የተከሰተ ድንጋጤ ሲሆን ይህ ጉዳይ ደግሞ ለእነዛ ሰዎች እንቅፋት ሆኖ ነበር፣ ለእኛም ቢሆን ድንጋጤ የሚፈጥርብን ነገር ነው። በእርግጥ ኢየሱስ የዘላለምን ሕይወት የሚያስገኘው እውነተኛ የመዳን እንጀራ ሥጋው መሆኑን ያረጋግጣል፣ ሕጎችን ከማክበር ወይም ሃይማኖታዊ መመሪያዎችን ተግባራዊ ከማድረግ በፊት ከእግዚአብሔር ጋር ወደ ኅብረት ለመግባት ፣ ከእርሱ ጋር እውነተኛ እና ተጨባጭ ግንኙነት መኖር አስፈላጊ ነው። ምክንያቱም መዳን ከእርሱ የመጣ ነው፣ ቃል ሥጋ በመልበሱ የተነሳ የተገኘ ነው። ይህ ማለት አንድ ሰው እግዚአብሔርን በሕልም እና በታላቅነት እና በኃይል ምስሎች ብቻ መከታተል የለበትም ፣ ነገር ግን እርሱ በኢየሱስ ሰብአዊነት እና በውጤቱም ፣ በሕይወታችን መንገድ ላይ በምናገኛቸው ወንድሞች እና እህቶች ውስጥ መታወቅ አለበት። እግዚአብሔር ራሱን ሥጋ አደረገ። እናም ይህን ስንል ፣ የሃይማኖት መግለጫ በመሆነው በጸሎተ ሐይማኖት፣ በገና ቀን ቃል ሥጋ መልበሱ የታወጀበትን ቃል በምናውጅበት ወቅት ይህንን ቃል ሥጋ የለበሰበትን ምስጢር ለማምለክ የምንበረከከው በዚህ ምክንያት ነው።  እግዚአብሔር ራሱን ሥጋና ደም አደረገ ፤ እንደ እኛ ሰው ለመሆን ራሱን ዝቅ አደረገ። እርሱ መከራችን እና ኃጢአታችንን እርሱ ራሱ ተሸክሞ ራሱን አዋረደ ፣ስለዚህ እኛ ከክርስቶስ እና ከወንድሞቻችን እና ከእህቶቻችን ጋር ባለን ግንኙነት እንጂ ከሕይወት እና ከታሪክ ውጭ እንድንፈልገው አልጠየቀንም። እርሱን በህይወት ፣ በታሪክ ፣ በዕለት ተዕለት ሕይወታችን መፈለግ አስፈላጊ ነው። እናም ይህ ፣ ወንድሞቼ እና እህቶቼ  ከእግዚአብሔር ጋር የመገናኘት መንገድ ነው፣ ከክርስቶስ እና ከወንድሞቻችን እና ከእህቶቻችን ጋር ያለው ግንኙነት ሁል ጊዜም ወደ ደህንነት የሚመራን መንገድ ነው።

ዛሬም ቢሆን ፣ በኢየሱስ ሰብአዊነት ውስጥ የእግዚአብሔር መገለጥ ድንጋጤን ሊያስከትል እና ለመቀበል ቀላል አይደለም። ተአምራትን ወይም ዓለማዊ ጥበብን በሚሹ ሰዎች ፊት ቅዱስ ጳውሎስ የወንጌል “ሞኝነት” ብሎ የጠራው ይህ ነው (1 ቆሮ 1፡18-25)። እናም ይህ “ድንጋጤ” በቅዱስ ቁርባን በደንብ ይወከላል -በዓለም እይታ በአንድ ቁራሽ እንጀራ ፊት መንበርከክ ምን ዓይነት ስሜት ሊኖር ይችላል? በምድር ላይ አንድ ሰው በዚህ እንጀራ ለምን አጥብቆ መመገብ አለበት? ይህ ለዓለም ድንጋጤን ይፈጥራል።

በአምስት እንጀራና በሁለት ዓሣ በብዙ ሺዎች የሚቆጠሩ ሰዎችን በመገበበት ወቅት ይህን አስደናቂ ነገር ያዩ ሰዎች በኢየሱስ ድርጊት ተገርመው እና ተደንቀው ነበር፣ እያንዳንዱ ሰው አመስግኖት እሱን ሊያነግሱት እና ድል አድራጊ እንደ ሆነ ቆጥረውት ነበር። ነገር ግን እሱ ራሱ ሲገልጽ የሕይወቱ መስዋዕትነት፣ ማለትም የሕይወቱ ስጦታ ፣ የሥጋና ደሙ ምልክት መሆኑን እና እሱን ለመከተል የሚፈልጉ ሁሉ እርሱን መምሰል አለባቸው ፣ ለእግዚአብሔር እና ለሌሎች የተሰጠው ሰብአዊነቱን መቀበል አለባቸው፣ ነገር ግን ይህ ኢየሱስ ከእንግዲህ ወዲህ አልተወደደም ፣ ይህ ኢየሱስ ወደ ቀውስ ውስጥ ያስገባናል። ይልቁንም እሱ ወደ ቀውስ ካልከተተን ልንጨነቅ ይገባናል ፣ ምክንያቱም እኛ በመልእክቱ ላይ ውሃ ቸልሰን ይሆናል! እናም በእርሱ “የዘላለም ሕይወት ቃሎች” እንድንነካ እና እንድንለወጥ ጸጋን እንለምን። እናም ኢየሱስን በሥጋ የወለደችው እና ከእርሱ መሥዋዕት ጋር የተቀላቀለችው ቅድስት ማርያም በእውነተኛው ሕይወታችን ስለ እምነታችን ሁል ጊዜ እንድንመሰክር ትርዳን።

22 August 2021, 09:59

የገብርኤል ብሥራት ጥንታዊ መሠርት የያዘና የጌታችን እየሱስ ክርስቶስን ሰው መሆን በማስታወስ በቀን ሦስት ጊዜ ማለትም በንጋት (በአስራሁለት ሰዓት) በቀትር (በስድስት ሰዓት) እንዲሁም በማታ (በአስራሁለት ሰዓት) የሚደገም የጸሎት ዓይነት ሲሆን ጸሎቱ በሚደገምበት ሰዓት ቤተ ክርስቲያንም የመልኣከ እግዚኣብሔርን ደወል በዚሁ ሰዓት ትደውላለች። ይህ ጸሎት መልኣከ እግዚኣብሔር የሚለውን ስያሜ ያገኝው ከጸሎቱ ከመጀመሪያ ስንኝ የእግዚኣብሔር መልኣከ ማርያምን አበሠራት ከሚለው የተወሰደ ሲሆን ጸሎቱ ስለ ጌታችን እየሱስ ክርስቶስ ሰው መሆን ይናገራል። ጸሎቱ በሦስት የተከፈሉ አጫጭር ስንኞች ሲኖሩት በእነኚህ በሦስት አጫጭር ስንኞች መሓል ጸጋን የተሞላሽ የሚለው የማርያም ጸሎት ይደገማል። ይህ ጸሎት በሰንበትና በበዓላት ዕለት ልክ በእኩለ ቀን ላይ በዕለቱ ወንጌል ላይ ትንሽ አስተምሮና ገለፃ ከሰጡ በኋላ ርዕሰ ሊቃነ ጳጳሳት በቅዱስ ጴጥሮስ ኣደባባይ ላይ ይህንን ጸሎት ይመራሉ። በመቀጠልም በአደባባዩ ላይ የተገኝው ከተለያየ ቦታ ለንግደት የመጣውን ሕዝብ ሰላምታ ይሰጣሉ።በየትኛውም ጊዜ ከበዓለ ፋሲካ እስከ በዓለ ጰራቅሊጦስ በመልኣከ እግዚኣብሔር ጸሎት ፈንታ የጌታችን እየሱስ ክርስቶስን ትንሣኤ የሚዘክረውን “የሰማይ ንግሥት ሆይ ደስ ይበልሽ” የሚለው ጸሎት የሚደገም ሲሆን በመሓል በመሓሉ ጸጋን የተሞላሽ ማርያም ሆይ የሚለው ጸሎት ይታከልበታል።

መልኣኩ ገብርኤል ማሪያምን አበሰራት የሚለው የቀርብ ጊዜ ጸሎት

ሁሉንም ያንብቡ >