ር.ሊ.ጳ ፍራንቸስኮስ ጸሎት በኢየሱስ ልብ እይታ ሲጸልይ ተዓምር ሊሰራ ይችላል አሉ!

ርዕሰ ሊቃነ ጳጳሳት ፍራንቸስኮስ ዘወትር ረቡዕ ዕለት በቫቲካን የጠቅላላ የትምህርተ ክርስቶስ አስተምህሮ እንደ ሚያደርጉ የሚታወቅ ሲሆን በእዚህም መሰረት ቅዱስነታቸው በየካቲት 03/2013 ዓ.ም ባደረጉት የጠቅላላ የትምህርተ ክርስቶስ አስተምህሮ ጸሎት በኢየሱስ ልብ እይታ ሲጸልይ ተዓምር ሊሰራ ይችላል ማለታቸው ተገልጿል።

የእዚህ ዝግጅት አቅራቢ መብራቱ ኃ/ጊዮርጊስ ቫቲካን

ክቡራን እና ክቡራት የዝግጅቶቻችን ተከታታዮች ርዕሰ ሊቃነ ጳጳሳት ፍራንቸስኮስ በወቅቱ ያደረጉትን የትምህርተ ክርስቶስ አስተምህሮ ሙሉ ይዘቱን እንደ ሚከተለው አሰናድተነዋል፣ ተከታተሉን።

የተወደዳችሁ ወንድሞቼ እና እህቶቼ እንደምን አረፈዳችሁ!

ቀድም ሲል ባደረግነው የጠቅላላ የትምህርተ ክርስቶስ አስተምህሮ ውስጥ የክርስቲያን ጸሎት ስርዓተ አምልኮን “እንዴት እንደ ደገፈ” ተመልክተናል። ዛሬ ስርዓተ አምልኮ ምንጊዜም ወደ ዕለታዊ ሕይወት እንዴት እንደሚመለስ እናሳያለን -በጎዳናዎች ፣ በቢሮዎች ፣ በትራንስፖርት ስፍራዎች ...ወዘተ ውስጥ። በዚያም ከእግዚአብሔር ጋር የሚደረግ ውይይት ይቀጥላል-የሚጸልይ ሁሉ የሚወደውን ሰው ሁልጊዜ በልቡ ውስጥ እንደሚሸከም እንደ አፍቃሪ ሰው ነው፣ የትም ቢሆን በልቡ ይሸከመዋል።

በእውነቱ ከእግዚአብሔር ጋር በዚህ ውይይት ውስጥ ሁሉም ነገር ተዋህዷል-እያንዳንዱ ደስታ የምስጋና ምክንያት ይሆናል ፣ እያንዳንዱ ፈተና ለእርዳታ ጥያቄ የማቅረብ አጋጣሚ ይከፍታል። ፀሎት በህይወት ውስጥ ሁል ጊዜ በህይወት ይኖራል፣ እንደ አንደ የተዳፈነ እሳት አፍ በማይናገርበት ጊዜም ቢሆን ጸሎት በልብ ውስጥ ይናገራል። እያንዳንዱ ሀሳብ ፣ ምንም እንኳን “ጸያፍ” ቢመስልም በጸሎት ሊሞላ ይችላል። በተጨማሪም በሰው ልጅ የማሰብ ችሎታ ውስጥ የጸሎት ገጽታ አለ፣ በእውነቱ እሱ ምስጢሩን የሚመለከት መስኮት ነው -ከፊታችን ያሉትን ጥቂት ደረጃዎች ያበራል እና ከዚያ በኋላ በአጠቃላይ ለእውነታው ይከፍታል፣ ይህ እውነታ ይቀድመዋል እና ይበልጣል። ይህ ምስጢር የሚረብሽ ወይም የሚያስጨንቅ ፊት የለውም ፣ በፍጹም የለውም፣ የክርስቶስ እውቀት የዓይኖቻችን እና የአዕምሯችን አይኖች ማየት በማይችሉበት ቦታ ምንም እንደሌለ እንድንተማመን ያደርገናል ፣ ነገር ግን አንድ ሰው እየጠበቀን እንደ ሆነ፣ ማለቂያ የሌለው ጸጋ በእዚያ እንደ ሚገኝ ያረጋግጥልናል። እናም ስለዚህ የክርስቲያን ጸሎት በሰው ልብ ውስጥ የማይበገር ተስፋን ያሰፍናል - ማንኛውም ልምዳችን መንገዳችንን የሚነካ ፣ የእግዚአብሔር ፍቅር ወደ ጥሩ ሊለውጠው ይችላል።

በዚህ ረገድ የካቶሊክ ቤተክርስቲያን ትምህርተ ክርስቶስ እንዲህ ይላል “በተወሰኑ ጊዜያት የጌታን ቃል በመስማትና ምስጢረ ፋሲካውንም በመሳተፍ ጸሎት እንማራለን። መንፈሱ ግን ጸሎት ከእኛ ይፈልቅ ዘንድ በእያንዳንዱ ቀን እውነቶች ሁልጊዜ ይሰጠናል። ጊዜ በአብ እጅ ነው። ከእርሱ ጋር የምንገናኘው አሁን፣ ዛሬ እንጂ ትላንትና ወይም ነገ አይደለም” (የካቶሊክ ቤተክርስቲያን ትምህርተ ክርስቶስ ቁ. 2659) ፡፡ ዛሬ እግዚአብሔርን አገናኛለሁ ፣ ሁል ጊዜም የግንኙነት ቀን ዛሬ ነው።

እያጋጠመን ካለው የዛሬው ቀን የበለጠ ሌላ አስደናቂ ቀን የለም። ስለወደፊቱ በማሰብ ሁል ጊዜ የሚኖሩ ሰዎች “ግን መጪው ጊዜ የተሻለ ይሆናል ...” ይላሉ እንጂ ነገር ግን ዛሬን እንደ ሁኔታው አይቀበሉትም። የእዚህ ዓይነት ሰዎች ደግሞ በቅዤት ውስጥ የሚኖሩ ሰዎች ናቸው፣እንዴት እንደሚወስዱ አያውቁም የእውነታው ተጨባጭነትን ይዘነጋሉ። እና ዛሬ እውነተኛ ነው ፣ ዛሬ ያለውን ተጨባጭ የሆነ ነገር መቀበል አይፈልጉም። እናም ጸሎት ዛሬ ነው መከናወን የሚገባው። ኢየሱስ ዛሬ እኛን ለመገናኘት መጥቷል፣ ዛሬ እያገኘነው ነው ያለነው። እናም ዛሬ ይህንን ወደ ፀጋ የሚቀይረው ጸሎት ነው፣ ወይም ይልቁኑ እኛን የሚቀይረን - ቁጣን የሚያበርድ ፣ ፍቅርን የሚደግፍ ፣ ደስታን የሚያበዛ ፣ ይቅር ለማለት ጥንካሬን የሚሰጠን ጸሎት ነው። በተወሰኑ ጊዜያት ውስጥ ከእንግዲህ የማንኖር ይመስለናል ፣ መጸለይ ግን ጸጋ በጸሎት በእኛ ውስጥ የሚኖር እና የሚሠራ እንዲሆን ያደረጋል። እናም ወደ ምሬት የሚመራን የቁጣ ፣ የቅሬታ ስሜት ሲኖር መጸለይ ይኖርብናል። ቆም ብለን ጌታን እንጠይቀው “የት ነው የምትኖረው? እኔ ወደ የት እየሄድኩኝ ነው? ብለን እንጠይቀው። እናም ጌታ እዚያ አለ ፣ ጌታ ያን መራራ የሆነ ሕይወት አስወግዶ በትክክለኛው መንገድ ለመቀጠል ቃሉን እና ምክሩን ይሰጠናል። ጸሎት ወደ ፊት እንድንሄድ ያደርገናል።  እያንዳንዱ ቀን የሚጀመረው በጸሎት ከሆነ ቀኑን በሙሉ በድፍረት እና በጥንካሬ እንድናሳልፍ ይረዳናል። ስለሆነም የሚገጥመንን ችግሮች ከእንግዲህ ለደስታችን እንቅፋት አይደሉም፣ ነገር ግን ከእግዚአብሔር ዘንድ የምንለምነው ፣ ከእርሱ ጋር የምንገናኝባቸው አጋጣሚዎች ይሆናሉ እንጂ። እናም አንድ ሰው በጌታ ሲታጀብ ደፋር ፣ ነፃ እና አልፎ ተርፎም ደስተኛ እንደሆነ ይሰማዋል።

ስለዚህ ሁል ጊዜ ስለ ሁሉም ነገር እና ለሁሉም ፣ ለጠላቶቻችንም ጭምር እንጸልይ። ኢየሱስ ይህንን በተመለከተ ሲመክረን “ለጠላቶቻችሁ ጸልዩ” ብሏል። ለምንወዳቸው ሰዎች ብቻ ሳይሆን የምንጸልየው ነገር ግን ለማናውቃቸው ሰዎች ጭምር ነው። ቅዱሳት መጻሕፍት ብዙውን ጊዜ እንድናደርግ እንደሚጋብዙን ቀድም ሲል እንደ ተናገርኩት ለጠላቶቻችን እንኳን መጸለይ ይኖርብናል። ጸሎት ከመጠን በላይ የሆነ ፍቅር ይሰጣል ፡፡ ደስተኛ ላልሆኑት ሰዎች እነርሱን የሚጠባበቅ  ፍቅር እንዳለ እንዲያምኑ በብቸኝነት ለሚኖሩ እና ተስፋ ለቆረጡ ሁሉ ከምንም በላይ እንጸልይ። ጸሎት ተዓምራትን ያደርጋል፣ እናም ድሆች በዚያን ጊዜ በእግዚአብሔር ቸርነት ፣ በአስቸጋሪ ሁኔታ ውስጥ እንኳን ፣ የክርስቲያን ጸሎት ኢየሱስ ርህራሄውን እንዲያሳያቸው በእውነቱ እርሱ የደከሙትን እና የጠፉት በጎቹን በርኅራኄ እንደ ተመለከተ ሁሉ እኛም እነርሱን በርኅራኄ እንድንመለከት ያደርገናል። የእኛ ጌታ ይህንን ጉዳይ በፍጹም አንርሳ - በርህራሄ የተሞላ እና ቅርብ የሆነ ጌታ ነው - መቼም የማይረሱ ሦስት ቃላት አሉ። ምክንያቱም የጌታ ባሕሪይ ምሕረት፣ ርህራሄ ፣ ቅርብ መሆን ነው።

ስህተቶች እና ኃጢአቶች ቢኖሩም ጸሎት ሌሎችን እንድንወድ ይረዳናል። ሰው ሁል ጊዜ ከተግባሩ በላይ አስፈላጊ ነው፣ እናም ኢየሱስ በዓለም ላይ አልፈረደም ፣ ነገር ግን እሱ ዓለምን አድኗል። ሁል ጊዜ በሌሎች ላይ ለሚፈርዱ ፣ ሁል ጊዜም የሚያወግዙ ፣ የሚረግሙ ሰዎች  መጥፎ ሕይወት ያላቸው ሰዎች ናቸው -መጥፎ ፣ ደስተኛ ያልሆነ ሕይወት ያላቸው ሰዎች ናቸው። ኢየሱስ እኛን ለማዳን መጥቷል -ልባችሁን ክፈቱለት፣ ሌሎችን ይቅር በሉ፣ ሰዎችን ተረዱ፣ እናንተም ለሌሎች ሰዎች ቅርብ ሁኑ፣ ርህሩህ ሁኑ፣ እንደ ኢየሱስ ርህራሄ ይኑራችሁ።ሁላችንም ኃጢአተኞች እንደሆንን በማስታወስ በጸሎት እያንዳንዱን ሰው መውደድ አለብን። እናም በተመሳሳይ ጊዜ እያንዳንዱ ሰው በእግዚአብሔር እንደ ተወደደ መናገር ይኖርብናል። ይህንን ዓለም በዚህ መንገድ መውደድ ፣ በርህራሄ መውደድ ፣ በየቀኑ እና ሁሉም ነገር በራሱ ውስጥ የተደበቀ የእግዚአብሔርን ምስጢር እርሾ እንደሚይዝ እንረዳለን።

የካቶሊክ ቤተክርስቲያን ትምህርተ ክርስቶስ አስተምህሮ ይህንን በተመለከተ ሲናገር እንዲህ ይላል “በየዕለቱ እና በየቅጽበቱ የሚፈጸሙ ሁነቶች የሚደረግ ጸሎት ለ “ታናናሾቹ”፣ ለክርስቶስ አገልጋዮች፣ ለብፅዕናቸው ትሁታን ከተገለጹት በታሪክ ጉዞ ላይ ተጽኖውን ያሳርፍ ዘንድ መጸለይ ተገቢ እና መልካም ነው፣ ይሁንና ትሁታን ወደ ሆኑት ዕለታዊ ሁነታዎች የጸሎትን እገዛ መሳብ ያንኑ የሚመስለውን እርሾ ሊሆን ይችላል። ሁሉም የጸሎት ዓይነቶች ጌታ መንግሥቱን ከሚያወዳድርበት እርሾ ጋር ተመሳሳይ ሊሆኑ ይችላሉ ”(የካቶሊክ ቤተክርስቲያን ትምህርተ ክርስቶስ ቁ. 2660)።

ሰው - የሰው ልጅ ፣ ወንድና ሴት - እንደ እስትንፋስ ፣ እንደ ሣር ቅጠል ነው (መዝ 144.4 ፣ 103.15)። ፈላስፋው ፓስካል “መላው አጽናፈ ሰማይ እሱን ለመጨፍለቅ መታጠቅ አያስፈልገውም ፤ አንድ ጠብታ ውሃ እሱን ለመግደል በቂ ነው” ብሎ ነበር። እኛ ተሰባሪ ፍጡራን ነን ፣ ነገር ግን እንዴት መጸለይ እንዳለብን እናውቃለን-ይህ ትልቁ ክብራችን ነው ፣ እሱ የእኛም ጥንካሬ ነው። ጌታ ወደ እኛ ቅርብ ስለሆነ ሁል ጊዜ ​​በሁሉም ሁኔታዎች እንጸልይ። ጸሎት በእየሱስ የልብ እይታ በሚጸለይበት ወቅት ተዓምር ሊሰራ ይችላል።