Vatican News
ርዕሰ ሊቃነ ጳጳሳት ፍራንቸስኮ በቫቲካን የቅዱስ ጴጥሮስ አደባባይ ርዕሰ ሊቃነ ጳጳሳት ፍራንቸስኮ በቫቲካን የቅዱስ ጴጥሮስ አደባባይ  (AFP or licensors)

ር.ሊ.ጳ ፍራንቸስኮስ “ማንም ሰው ሊወደን በማይችል መልኩ እግ/ሔር አባታችን ይወደናል” አሉ

ርዕሰ ሊቃነ ጳጳሳት ፍራቸስኮስ ዘወትር ረቡዕ እለት በቫቲካን በሚገኘው በቅዱስ ጴጥሮስ አደባባይ ወይም በቫቲካን በሚገኘው የጳውሎስ ስድስተኛ የስብሰባ አዳራሻ ለሚሰበሰቡ ምዕመናን፣ መንፈሳዊ ነጋዲያን እና የሀገር ጎብኝዎች በተለያዩ አርእስቶች ላይ ተመርኩዘው የጠቅላላ የትምሕርተ ክርስቶስ አስተምህሮ እንደ ሚያደርጉ ይታወቃል። በዚህ መሰረት በኅዳር 26/2011 ዓ.ም በቫቲካን በሚገኘው የጳውሎስ 6ኛ የስብሰባ አዳራሽ ያደርጉት የጠቅላላ የተምህርተ ክርስቶስ አስተምህሮ “አባታችን ሆይ” በሚለው ጸሎት ዙሪያ ላይ መሰረቱን ያደርገ የክፍል አንድ አስተምህሮ እንደ ነበረ መዘገባችን የሚታወስ ሲሆን “ኢየሱስ ጸሎት መጸለይ እንዲይስተምረን ልንጠይቀው ይገባል” ማለታቸውን መዘገባችን ይታወሳል።

የዚህ ዝግጅት አቅራቢ መብራቱ ኃ/ጊዮርጊስ-ቫቲካን

በታኅሳስ 03/2011 ዓ.ም አሁንም “አባታችን ሆይ” በሚለው ጸሎት ዙርያ ላይ ባደርጉት የክፍል ሁለት የጠቅላላ የትምህርተ ክርስቶስ አስተምህሮ “አባታችን ሆይ” የሚለውን ጸሎት “በእግዚኣብሔር በመተማመን ልንጸልየው የሚገባን ጸሎት ነው” ማለታቸው የሚታወስ ሲሆን በታኅሳስ 24/2011 ዓ.ም አሁንም “አባታችን ሆይ!” በሚለው ጸሎት ዙርያ ላይ ባደርጉት የክፍል ሦስት የትምህርተ ክርስቶስ አስተምህሮ “ሳትለምነው  በፊት ምን እንደ ሚያስፈልግህ  በሚያውቀው አባትህ ፊት ሆነህ ጸልይ” (ማቴ. 6፡6) የእኛ አምላክ የሆነው እግዚኣብሔር እርሱ ከእኛ ምንም ነገር አይፈልግም፣ ነገር ግን እርሱ ከእኛ የሚፈልገው አንድ ነገር ቢኖር የእርሱ በጣም ተወዳጅ ልጆቹ የሆንን እኛ፣ በጸሎት ሁልጊዜ ከእርሱ ጋር ለመገናኘት የሚያስችለንን የመገናኛ መስመር ሁልጊዜ ክፍት እንድናደርግ ብቻ ነው የሚጠይቀን” ማለታቸውን መዘገባችን ይታወሳል።

በጥር 1/2011 ዓ.ም አሁንም “አባታችን ሆይ” በሚለው ጸሎት ዙርያ ባደርጉት የክፍል አራት የጠቅላላ የትምህርተ ክርስቶስ አስተምህሮ ቅዱስነታቸው እንደ ገለጹት “ማነኛውም ዓይነት ጸሎት ወደ እግዚ/ር ዘንድ ሳይደርስ እንዲሁ በከንቱ አይቀርም!  እርሱ እግዚኣብሔር አባት በመሆኑ የተነሳ በመከራ ውስጥ ሆነው እርሱን የሚለምኑትን ልጆቹን በፍጹም አይረሳም” ማለታቸውን የሚታወስ ሲሆን በጥር 08/2011 ዓ.ም “አባታችን ሆይ!” በሚለው ጸሎት ዙሪያ ባደረጉት የክፍል አምስት የጠቅላላ የትምህርተ ክርስቶስ አስተምህሮ ደግሞ አባ" ማለት እግዚአብሔርን "አባት" ብሎ ከመጥራት የበለጠ ልብ የሚነካ ስሜት እንደ ሌለ ያሳየናል”  ማለታቸውን መዘገባችን ይታወሳል።

ቅዱስነታቸው ከዚህ በላይ የተጠቀሱትን “አባታችን ሆይ” በሚለው ጸሎት ዙሪያ በተከታታይ ሲያደርጉት የነበረውን የጠቅላላ አስተምህሮ ይህንን ያህል ካስታወስናችሁ ቅዱስነታቸው በዚህ “አባታችን ሆይ” በሚለው ጸሎት ዙሪያ በተከታታይ ሲያደርጉት የነበረውን የጠቅላላ አስተምህሮ በቅርቡ በፓናማ፣ ቀጥሎም የተባበሩት የአረብ ኤምሬትስ ዋና ከተማ በሆነችው በአቡዳቢ አድርገውት በነበረው ሐዋርያዊ ጉብኝት ምክንያት ይህንን አስተምህሮ ለሦስት ሳምንታት ያህል አቋርጠው የነበረ ሲሆን ከዚያም በመቀጠል በየካቲት 06/2011 ዓ.ም አሁንም በዚሁ “አባታችን ሆይ” በሚለው ጸሎት ዙርያ ላይ ባደርጉት የክፍል ስድስት የጠቅላላ አስተምህሮ እንደ ገለጹት “እውነተኛ ጸሎት ተጨባጭ የሆነና በርኅራኄ መንፈስ የተሞላ ጸሎት ሊሆን የገባዋል!” ማለታቸውንም መዘገባችን ይታወሳል።

ርዕሰ ሊቃነ ጳጳሳት ፍራንቸስኮስ በዛሬው እለት ማለትም በየካቲት 13/2011 ዓ.ም በቫቲካን በሚገኘው በቅዱስ ጴጥሮስ አደባባይ አሁንም “አባታችን ሆይ!” በሚለው ጸሎት ዙሪያ ባደርጉት የክፍል ሰባት የጠቅላላ የትምህርተ ክርስቶስ አስተምህሮ “በሰማይ የምትኖር አባታችን ሆይ!” በሚለው ጭብጥ ዙሪያ ላያ ያተኮረ እንደ ነበረ ከደረሰን ዘገባ ለመረዳት የተቻለ ሲሆን “ማንም ሰው ሊወደን በማይችል መልኩ እግ/ሔር አባታችን ይወደናል”  ማለታቸውን ለመረዳት ተችሉዋል።

ክቡራን እና ክቡራት የዝግጅቶቻችን ተከታታዮች ርዕሰ ሊቃነ ጳጳሳት ፍራንቸስኮስ በየካቲት 13/2011 ዓ.ም “በሰማይ የምትኖር አባታችን ሆይ!” በሚለው ጸሎት ዙሪያ ላይ ያደረጉትን የጠቅላላ የትምህርተ ክርስቶስ አስተምህሮ ሙሉ ይዘቱን እንደ ሚከተለው አሰናድተነዋል፣ ተከታተሉን።

የተወደዳችሁ ወንድሞቼ እና እህቶቼ እንደምን አረፈዳችሁ!

“አባታችን ሆይ!” በሚለው ጸሎት ዙሪያ ላይ የጀመርነውን አስተምህሮ ዛሬም እንቀጥላለን።  የእያንዳንዱ ክርስቲያን ጸሎት የሚጀምረው ምስጢራዊ በሆነ መልኩ የእግዚአብሔርን አባትነት በመግለጽ ነው። የእግዚአብሔር አባትነት ምን ያህል እንደሆነ ለመረዳት ያስችለን ዘንድ ወላጆቻችንን በማሰብ፣ ከእነርሱ ጋር ያለንን ግንኙነት “ጥርት ባለ መልኩ” እና ግልጽ በሆነ መንገድ ማወቅ ይኖርብናል። ይህንንም በተመለከተ ደግሞ የካቶሊክ ቤተ ክርስቲያን ትምህርተ ክርስቶስ በቁጥር 2779 ላይ እንዲህ ይላል የልቦቻችን ንጽሕና ከግላዊ እና ባሕላዊ ታሪክ በሚመነጭና  ከእግዚኣብሔር ጋር ያለንን ግንኙነት  አቅጣጫ በመወሰን ከአባትነት ወይም እናትነት ምሳሌዎች ጋር የተያያዘ ነው” ይለናል።

ማናችንም ብንሆን ፍጹም የሆኑ ወላጆች አልነበሩም፣ እኛም ብንሆን በተራችን ፍጹም የሆንን ወላጆች ወይም የቤተ ክርስቲያን አባቶች ልንሆን አንችልም። ማነኛውንም ዓይነት የፍቅር ግንኙነት የምንመሰርተውና የምንኖረው  የእኛን አቅም ውስንነት እና የራስ ወዳድነት መንፈስ ከግምት ባስገባ መልኩ በመግለጽ ሲሆን በዚህ ምክንያት የተነሳ እነርሱን የግላችን አድርገን ለመያዝ ወይም ሌሎችን ለመጫን በሚፈልጉ ምኞቶች የተበከሉ ናቸው። ለዚህ ነው አንዳንድ ጊዜ የፍቅር መግለጫዎች ወደ ቁጣ እና ጥላቻ የሚቀየሩት።

ለዚያም ነው ታዲያ እግዚአብሔር "አባት" መሆኑን በምንነጋገርበት ወቅት የእኛን መልካምነት ይመኙልን የነበሩትን የወላጆቻችንን ምስል በማሰብ ከዚያ ባሻገር መሄድ የሚገባን በዚሁ ምክንያት ነው። የእግዚአብሔር ፍቅር እኛ "በሰማያት ያለኸው" አባታችን በማለት ኢየሱስ እንድንጠቀምበት የሚጋብዝ አገላለጽ ነው። ይህ ፍቅር ደግሞ ፍጽምና ወይም ምልአት ያለው እኛ በዚህ ምድር ያለን ሰዎች የጎደለን ዓይነ ፍቅር ነው። ወንዶችም ሆኑ ሴቶች ለዘለዓለም ለመወደድ የሚያስችላቸውን ቦታ ለማግኘት ተግተው እየፈለጉ የሚገኙ ቢሆኑም ቅሉ፣ ነገር ግን ይህንን ፍቅር አለጋኙትም። በዓለማችን ውስጥ እጅግ ብዙ የሚባሉ ጓደኝነቶች እና ፍቅሮች ተስፋ በሚያስቆርጥ ሁኔታ ውስጥ እንደ ሚገኙም ይታወቃል።

የእኛ ፍቅር ደካማ መሆኑን ለማሳየት በማሰብ ነቢዩ ሆሴዕ ፍቅራችሁ እንደ ማለዳ ደመና፥ በማለዳም እንደሚያልፍ ጠል ነውና” (ት. ሆሴዕ 6:4) በማለት የተናገረውም በዚሁ ምክንያት ነው። የእኛ ፍቅር ብዙን ጊዜ እንዲህ ነው - ጠብቀን ለመቆየት የሚያስቸግረን ቃል ኪዳን፣ ቶሎ የሚመጣ እና ከዚያን ቶሎ በኖ የሚጠፋ ዓይነት ፍቅር፣ ልክ ጠዋት ፀሐይ ስትወጣ ማታ የነበረውን ጠል በፍጥነት እንደ ሚያስወግድው የእኛም ፍቅር ብዙን ጊዜ እንዲሁ ይሆናል።

እኛ ሰዎች በሕይወታችን ዘመን ስንት ጊዜ ነው በዚህ ዓይነት ደካማ እና ተቆራራጭ በሆነ መልኩ የወደድነው? ለመውደድ እንፈልጋለን፣ ነገር ግን ወዲያው ድክመቶች እና ውስንነቶች ያጋጥሙናል፡ በጸጋ ዘመን ውስጥ በነበርንበት ወቅት ገቢራዊ ለማድረግ ቀላል መስሎ ታይቶን የነበረውን ቃል ኪዳን ለመጠበቅ አቅሙ ያንሰናል። እንዲያውም ሐዋርያው ጴጥሮስ እንኳ ሳይቀር በዚህ ረገድ ፈርቶ እና ሸሽቶ ሄዶ ነበር። ከመጀመሪያው የሕይወት ዘመናችን ጀምሮ በጉዞዋችን ላይ ስንፈልገው የነበረውን ታላቅ እና ውድ የሆነ ሀብት ፍቅርን ሙሉ በሙሉ ማግኘት ተቸግረን እርሱን እየፈለግን እንኖራለን።

ይሁን እንጂ ከዚህ ለየት ያለ “በሰማይ የሚኖር አባታችን” ፍቅር አለ። ይህ ፍቅር ለሁሉም የሰው ልጆች ተደራሽ መሆኑን ግን ማንም ሊጠራጠረው አይገባም። እናት እና አባቶቻችን እኛ በምንፈልገው መጠን በሚገባ ወደውን የነበረ ባይሆንም እንኳን በሰማይ የሚኖረው እግዚአብሔር በዚህ ምድር ላይ የሚገኙ ሰዎች ሊወዱን ከሚችሉት በላይ የሚወደን እግዚኣብሔር በሰማይ ይገኛል። በዚህም ረገድ ነቢዩ ኢሳያስ “እናት የምታጠባውን ልጇን ልትረሳ ትችላለችን? ለወለደችውስ ልጅ አትራራምን? ምናልባት እርሷ ትረሳ ይሆናል፣ እኔ ግን በፍጹም አረሳችሁም። እነሆ በእጄ መዳፍ ላይ ቀርጫችኋለሁ” (ት. ኢሳያስ 49፡15-16)። ሁሉም ምድራዊ የሆኑ ፍቅሮቻችን ቢደናቀፉ እና በእጃችን ላይ ከአቧራ በቀር ምንም ነገር ሳይቀር በኖ ቢጠፋ እንኳን ሁል ጊዜም ቢሆን ለእኛ የሚሰጥ ልዩ እና ታማኝ የሆነው የእግዚኣብሔር ፍቅር አለ።

በፍቅር ረሃብ ውስጥ ሁላችንም የምንፈልገው ያልተፈጥረውን ነገር ሳይሆን ይልቁንም አባት የሆነውን  እግዚኣብሄር የማወቅ ግብዣ ነው። ለምሳሌ ያህል ቅዱስ አጎስጢኖስ የመጣው መንፈሳዊ ለውጥ በዚሁ መንገድ ነበር የተከሰተው፣ ወጣቱና ብሩህ የንግግር ችሎታ የነበረው አጎስጢኖስ በፍጥረታት መካከል ምንም ዓይነት ፍጡር ሊሰጠው ያልቻለውን ነገር ፈለገ፣ አንድ ቀን ግን እይታውን ወደ ላይ ከፍ አድርጎ የማየት ብርታት አገኘ። በዚያን ቀን እግዚኣብሔር መሆኑን አወቀ።

"በሰማያት ውስጥ" የሚለው አገላለጽ ርቀትን ለማሳየት የተቀመጠ አገላለጽ ሳይሆን ነገር ግን ሥር ነቀል ልዩነት ያለው ሌላ ገፅታ መኖሩን ለማሳየት የተቀመጠ ነው።

ስለዚህ መፍራት የለብንም! ማንም ሰው ቢሆን ብቻውን አይደለም። በምድር ላይ ያለው አባትህ በችግርህ ምክንያት የረሳህ ቢመስልህና በዚህ የተነሳ አንተ በእርሱ ቅር የተሰኘህ ብትሆንም የክርስትና እምነትን መሠረታዊ ልምድ ግን አልተነፈገህም፣ ይህም አንተ በጣም ተወዳጅ የሆንክ የእግዚአብሔር ልጅ መሆንህ ነው፣ በሕይወት ውስጥ እርሱ ለአንተ ያለውን ጥልቅ ፍቅር ሊያጠፋ የሚችል ምንም ነገር የለም።

 

20 February 2019, 14:03